Kërkohet deponi për mbeturinat inerte në Dibër

Deponia e qytetit të Dibrës është e ngushtë për vazhdimin të pranimit të mbeturinave inerte. Situata është shqetësuese meqë hapësirat të deponisë aktuale janë të kufizuara, kurse nga dita në ditë rriten sasitë të mëdha të mbeturinave inerte që vijnë si rezultat i ndërtimeve të shumta që bëhen në qytet dhe hedhjen e këtyre mbeturinave në deponinë aktuale.

Pikërisht për këtë shkak drejtoria e ndërmarrjes komunale “Standardi” në Dibër ka kërkuar nga pushteti vendor që të përcaktoj një lokacion të ri për hapjen të një deponie speciale për grumbullimin të mbeturinave inerte.

Në seancën e fundit të këshillit të komunës Dibër drejtori i ndërmarrjes komunale, Burim Kaba kërkoi që komuna të përcaktoj lokalitete të reja për hapjen e një deponie enkas për grumbullimin të materialeve inerte. Hedhja e mbeturinave inerte në deponinë e Dibrës shkakton dëme të mëdha dhe mbush deponinë me sasi të mëdha.

“Patjetër duhet të përcaktohet një lokacion tjetër për deponinë e inerteve. Ndërmarrja komunale dhe këshilli drejtues i ndërmarrjes kanë dhënë vlerësimin se aktualisht sasi të mëdha të materialeve ndërtimore që vijnë si rezultat i ndërtimeve të shumta dhe pastrimin e shtëpive të rrënuara, për çdo ditë hidhen në deponinë e qytetit e cila gjendet në afërsi të rrugës Dibër vendkalimi kufitar “Bllatë”. Kjo situatë me një dinamik të madhe mbush deponinë dhe dihet që materialet inerte zënë hapësira të mëdha. Prandaj drejtoria dhe këshilli drejtues i ndërmarrjes kërkon zgjidhje edhe atë me hapjen e një deponie të re. Nëse kështu vazhdohet deponia e qytetit nuk do të ketë kapacitete për të pranuar mbeturinat në një të ardhme të shpejt”, tha drejtori i ndërmarrjes Burim Kaba. Edhe nëse ndërmerren aktivitete për hapjen e një deponie të re, aktualisht deponia e qytetit mbushet me mbeturina shumë shpejt dhe prandaj kërkohet një zgjidhje afatgjate”, thotë ai.

Në ndërmarrjen komunale “Standardi”, kur janë në pyetje mbeturinat inerte poashtu ankohen për hedhjen të këtyre mbeturinave jo vetëm në deponinë e qytetit por edhe në shumë lokacione në periferinë e qytetit. Është një problem shumë i madh, thotë drejtori i ndërmarrjes komunale meqë formohen shumë shpejt deponitë e egra dhe investitorët nuk janë korrekt në lidhje me pastrimin të rrethit ku ndërtohen objekte. Ne si ndërmarrje komunale, thotë Kaba, jemi të angazhuar maksimalisht në pastrimin edhe në rrugët qendrore të qytetit për të pastruar inertet që investitorët përdorin gjatë ndërtimit.

Në këtë drejtim është kërkuar nga institucionet kompetente një angazhim më i madh që ata që investojnë të paguajnë edhe harxhimet për pastrim meqë nuk bëjnë vet pastrimin e mbeturinave të materialeve të ndërtimit siç janë rëra, betoni, çimentoja, tullat, etj.

Këshilli i komunës Dibër ka dhënë përkrahje për këta kërkesa por aktualisht thuhet se do të mendojnë për një lokacion të ri për një deponi enkas vetëm për mbeturina inerte. Përveç mbeturinave nga materialet e ndërtimit, problem është edhe hedhja e mobilierive të vjetra që hidhen vend e pa vend. Në Dibër ka funksionuar një projekt për grumbullimin të mobilierive të vjetra, por ai nga popullata nuk është shpërfillur. Edhe kjo shkakton probleme të mëdha për mirëmbajtjen e higjienës publike për ndërmarrjen komunale në Dibër.