Operacion i gjerë anti-drogë në Lezhë dhe Kurbin, asgjësohen 694 bimë narkotike kanabis sativa

Në kuadër të megaoperacionit të koduar “imazhi”, që po zhvillohet në Lezhë dhe në Kurbin është bërë e mundur sekuestrimi i parcelave të ndryshme me bimë narkotike.

Sipas policisë mësohet se janë djegur dhe asgjësuar 694 bimë narkotike kanabis sativa që u gjetën të kultivuara në tokë, në fshatra të ndryshme të rretheve Lezhë dhe Kurbin.

Skuadra të posaçme policore, të pajisura me dronë, kanë vijuar kontrollet intensive në terren dhe nga ajri, me prioritet zonat e thella malore me risk përsa i përket kultivimit të bimëve narkotike, në zbatim të planit operacional mbarëkombëtar, me fokus parandalimin, konstatimin dhe goditjen e kësaj veprimtarie kriminale.

Ndërkohë gjatë dhjetë fazave të mëparshme të këtij megaoperacioni, në zona të ndryshme të qarkut Lezhë, janë asgjësuar në total, 15,379 bimë narkotike cannabis sativa.

“Finalizohet faza e 11-të e këtij megaoperacioni, si rezultat i kontrolleve në zona të thella dhe të vështira malore, me forca policore dhe me dronë”, sqaron policia.

“Policia e Lezhës, në bashkëpunim me Prokurorinë pranë Gjykatës së Shkallës së Parë të Juridiksionit të Përgjithshëm Lezhë, vijon veprimet hetimore, me qëllim identifikimin dhe arrestimin e autorit/ëve të kësaj veprimtarie kriminale”, thuhet në njoftimin e policisë. /Telegrafi/