Ndërtesa e Qeverisë ndriçohet me flamurin e LGBTIQ+

Ndërtesa e Qeverisë së Kosovës është ndriçuar me flamurin e LGBTI-së për të shënuar Ditën Ndërkombëtare Kundër Homofobisë, Bifobisë dhe Transfobisë.

Pamjet janë shpërndarë nga Zyra e Kryeministrit Për Qeverisje të Mirë, në rrjetin social Facebook.

Ky veprim vjen si pjesë e angazhimit të Qeverisë për respektimin e të drejtave të komunitetit LGBTI dhe luftimin e diskriminimit në bazë të orientimit seksual dhe identitetit gjinor.

Pra, me ndriçimin e flamurit të LGBTI-së në ndërtesën e Qeverisë, Kosova shpreh angazhimin e saj për respektimin e të drejtave të njeriut dhe barazisë së të gjithë qytetarëve, pavarësisht orientimit seksual dhe identitetit gjinor.

CEL Kosova, përmes një postimi ka thënë se kjo ditë shënohet me qëllim të rritjes së ndërgjegjësimit për diskriminimin dhe dhunën me të cilën përballen individët LGBTIQ+ dhe të promovomit të të drejtave dhe mirëqenies së tyre.

“Ne sot po ndajmë një video me qasje satirike dhe të guximshme për t’u përballur me fanatizmin dhe gjuhën urrejtëse të anëtarëve homofobikë të parlamentit. Kjo video shërben si formë e kumtesës sociale se fjalët kanë pasoja dhe anëtarët e parlamentit duhet të mbahen përgjegjës për përjetësimin e diskriminimit”.

“Duke theksuar dhe kritikuar sjelljen diskriminuese, ne vazhdojmë përpjekjet tona për të sfiduar homofobinë dhe transfobinë, promovuar përfshirjen dhe avokuar për të drejtat LGBTIQ+”.

“Së bashku mund t’i thyejmë barrierat, të rrisim ndërgjegjësimin dhe të nxisim mirëkuptimin. Bashkohuni me ne për të shënuar IDAHOBIT 2023”, thuhet në njoftim./Telegrafi/