I mori 70 mijë euro biznesmeit duke u hequr si zyrtar i lartë, arrestohet 52-vjeçari

Policia e Shtetit ka arrestuar një 52-vjeçar që u kap në flagrancë duke i marrë me anë të mashtrimit, 70,000 euro, një biznesmeni.

52-vjeçari përdorte rrjetet sociale për t’iu kërkuar shuma të mëdha parash biznesmenëve, pasi iu prezantohej atyre si zyrtar i lartë i një institucioni shtetëror.

Policia ka sekuestruar në cilësinë e provës materiale 70,000 euro, një automjet dhe një aparat celular.

Vijon puna hetimore për dokumentimin e plotë të veprimtarisë kriminale të këtij shtetasi. Sakaq materialet i kaluan Prokurorisë së Tiranës, për veprën penale “Mashtrimi”.

“Gjatë operacionit policor të koduar “Arkitekti”, shërbimet e Policisë kanë kapur në flagrancë shtetasin Sh. H., 52 vjeç, banues në Tiranë, gjatë kohës që po i merrte shumën 70 000 euro, një shtetasi (biznesmen), të cilin e kishte mashtruar në komunikimet në rrjetet sociale, duke iu prezatuar si zyrtar i lartë i një institucioni shtetëror. Shuma 70 000 euro u sekuestrua në cilësinë e provës materiale, së bashku me një automjet dhe një aparat celular”, tha në një njoftim policia.

Nga veprimet hetimore dyshohet se 52-vjeçari ka mashtruar edhe shtetas të tjerë, në komunikimet në rrjetet sociale, duke i kërkuar para atyre, pasi iu prezantohej si zyrtar i lartë i një institucioni shtetëror. /Telegrafi/