Përdoruesit u ankuan se Facebook po çonte gabimisht kërkesat për miqësi, Meta thotë se gabimi është ndrequr

Përdorues në Facebook kanë raportuar një defekt të paqartë brenda platformës së njohur të medieve sociale.

Përdoruesit pretendojnë se Facebook në mënyrë të pashpjegueshme po i dërgon në mënyrë automatike kërkesat për miqësi tek individët kur dikush viziton profilet e tyre, transmeton Telegrafi.

Kjo çështje, e cila rrezikon potencialisht privatësinë dhe kontrollin e përdoruesve, ka tërhequr vëmendjen dhe ka ngjallur diskutime midis përdoruesve të prekur.

Gabimi duket se ndodhte kur një përdorues vizitonte profilin e një person tjetër, duke çuar një kërkesë automatike për miqësi nga vizitori tek pronari i profilit.

Ky veprim i papritur ka ngritur shqetësime tek përdoruesit për shkeljet e mundshme të kufijve personal.

Kompania mëmë e Facebook Meta, ka thënë për The Daily Beast se gabimi lidhur me këtë ishte rregulluar.

“Ne rregulluam një defekt në lidhje me një përditësim të fundit të aplikacionit që bëri që disa kërkesa për miq të dërgohen gabimisht në Facebook”, tha një zëdhënës i Meta- të premten. “Ne e kemi ndaluar që kjo të ndodhë dhe kërkojmë falje për çdo shqetësim që mund të ketë shkaktuar”. /Telegrafi/