Planet për stadiumin e ri prej 112,000 ulësesh të Boca Juniors janë jashtë çdo imagjinate

Një kandidat për postin e presidentit të Boca Juniors ka zbuluar planet e tij për një stadium të ri me 112,000 vendesh, i cili padyshim do të bëhej një nga stadiumet më spektakolare në futbollin botëror.

Jorge Reale, një biznesmen nga Mendoza, i cili është gjithashtu një tifoz i madh i Boca Juniors, po propozon “Nueva Bombonera” – një arenë që do të vendoset pak më shumë se një kilometër larg nga terreni i tyre aktual; Estadio historike Alberto J. Armando.

Në të kaluarën, ka pasur thirrje për të modernizuar stadiumin që u ndërtua fillimisht në vitin 1940. Ai u rinovua në vitin 1996, por duket se gjendja e tij është përkeqësuar që atëherë.

Në fakt, vitin e kaluar, gjatë një ndeshje të Copa Libertadores midis Boca dhe skuadrës braziliane Corinthians, pamjet tronditëse treguan një çarje të madhe në një nga tribunat.

Përpara emërimit të një presidenti të ri, kandidati Jorge Reale ka prezantuar një koncept të ri stadiumi që do të ndërtohej në ishullin Demarchi, i cili është vetëm 1.3 kilometra nga vendi historik 805 Brandsen St.

Projekti, nga arkitekti Enrique Lombardi, do të kishte 444 hapësira VIP, 78 kabina televizive, 4,000 vende parkimi dhe 112,000 vende për bazën e madhe të tifozëve të Boca-s.

Lexo po ashtu Stadiumi i Boca Juniors sa nuk ka shkaktuar një tragjedi - dalin pamjet nga 'La Bombonera' e ndarë në dysh

“Me La Nueva Bombonera (stadiumi i ri), ne mbetemi në lagjen tonë që na identifikon kaq shumë”, ka thënë Reale.

“Ne jo vetëm që zgjidhim çështjen e kapaciteteve, por i japim zgjidhje edhe një problemi shumë më të madh me të cilin klubi po përballet prej vitesh: anëtarëve të ri”.

“Të gjithë anëtarët do të kishin të njëjtat të drejta dhe të njëjtat shanse për të mbështetur klubin që duan”, ka shtuar më tej ai.

Boca aktualisht ka 315,000 anëtarë aktivë – një nga më të mëdhenjtë në botë – që do të thotë se 59,000 vendet në stadiumin e tyre aktual kanë qenë një problem. Megjithatë, ky propozim i ri do të ndihmonte në zgjidhjen e disa prej këtyre problemeve. /Telegrafi/