Kërcënoi pronaren e banesës, detaje nga arrestimi i 34-vjeçarit qe vrau kushëririn në Shkodër

Policia ka zbardhur detaje të reja nga arrestimi i Lekë Vuksanit, i cili mesditën e 2 majit vrau me armë zjarri kushëririn e tij Petrit Vuksani, 51-vjeç në Shkodër.

Blutë bëjnë me dije se 34-vjeçari u lokalizua në një banesë në rrugën “Pjetër Budi”, Shkodër, ku ishte strehuar pasi kishte kërcënuar pronaren e kësaj banese.

“34-vjeçari u lokalizua në banesën e një shtetaseje, në rrugën “Pjetër Budi”, Shkodër, banesë në të cilën kishte mundur të strehohej pasi gjatë natës kishte kërcënuar pronaren e kësaj banese për t’i hapur derën dhe për të mos kallëzuar”, njofton policia. Gjithashtu, në të njëjtën banesë, u gjet edhe arma e zjarrit automatik me të cilën dyshohet se autori kreu vrasjen.

Lexo po ashtu Vrasja në Shkodër, arrestohet kushëriri i viktimës pas 21 orësh ndjekje

Petrit Vuksani jetonte prej vitesh jashtë shtetit dhe banesën ia kishte dhënë me qira Lekë Vuksanit, të afërmit të tij.

51-vjeçari, i cili sapo ishte kthyer nga Anglia, i ka shkuar në banesë për t’i kërkuar lekët e qirasë, por dyshohet se ata kanë debatuar dhe më pas Lekë Vuksani ka qëlluar në drejtim të kushëririt të tij ku e ka lënë të vdekur në vend.

Lexo po ashtu Zbardhet ngjarja në Shkodër, dyshohet se viktima është vrarë nga kushëriri pas një konflikti për pagesën e qirasë

Grupi hetimor, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Shkodër, vijon punën për dokumentimin e plotë ligjor të këtij rasti.