Në Komunën e Haraçinës ka 2.331 kërkesa për legalizim, asnjë kërkesë për ndërtim

Në raportin e publikar për funksionimin e Komunës së Haraçinës, Enti Shtetëror për Revizion thekson se në vitin 2021 pushteti lokal nuk ka pranuar asnjë kërkesë për leje ndërtimi, por mbi 2.000 objekte janë në pritje të legalizimit.

“Sa i përket procedurës dhe mënyrës së dhënies së lejes së ndërtimit gjatë vitit 2021, në auditim thuhet se Komuna e Haraçinës nuk ka lëshuar asnjë leje ndërtimi, andaj nuk ka marrë asnjë të ardhur në bazë të kompensimit për zhvillimin e tokës ndërtimore. Kjo gjendje nuk është në përputhje me dispozitat e nenit 59 paragrafi 13 të Ligjit për ndërtim, ku rregullohet se leja e ndërtimit lëshohet në afat prej 5 ditësh pune nga dorëzimi i vërtetimit të kompensimit të paguar për rregullimin e tokës ndërtimore”, thuhet në raport.

Revizioni po ashtu ka vërtetuar se ka mbi dy mijë kërkesa për legalizim të pronave gjatë kësaj periudhe.

“Në Komunën e Haraçinës, në pajtim me ndryshimet e Ligjit, brenda afatit janë dorëzuar gjithsej 2.331 kërkesa për përcaktimin e gjendjes juridike të objekteve të ndërtuara pa leje, prej të cilave 305 janë zgjidhur , 92 kërkesa janë në proces, për 212 kërkesa janë marrë vendim për përfundim të procedurës dhe 1.722 kërksa janë refuzuar për shkak të dokumentacionit jo të plotë”, thuhet në raport./Telegrafi/