Në Ditën Ndërkombëtare të Romëve, Kurti: Qeveria e përkushtuar që të gjithë qytetarët të trajtohen pa diskriminim

Kryeministri i vendit, Albin Kurti, ka uruar komunitetin rom për Ditën Ndërkombëtare të tyre, duke thënë se qeveria është e përkushtuar që qytetarët të trajtohen pa diskriminim.

Përmes një njoftimi për media, Kurti ka thënë kanë hartuar Strategjinë për Avancimin e të Drejtave të Komunitetit Rom dhe Ashkali 2022-2026.

“Qeveria jonë është e përkushtuar që të gjithë qytetarët e Kosovës të trajtohen pa diskriminim. Prandaj kemi punuar dhe angazhohemi vazhdimisht bashkërisht për të drejta të barabarta individuale dhe kolektive të përfaqësuesve të të gjitha komuniteteve. Me këtë synim së bashku kemi hartuar Strategjinë për Avancimin e të Drejtave të Komunitetit Rom dhe Ashkali 2022-2026, si dhe kemi lansuar Platformën Kombëtare për Raportimin e Rasteve të Diskriminimit ndaj komunitetit rom, ashkali dhe egjiptian”, thuhet në njoftim.

Po ashtu në letrën përshëndetëse dërguar komunitetit romë, Kurti ka thënë se kanë themeluar Ekipin Ndërinstitucional për nxitjen dhe promovimin e punësimit për komunitetet rom, ashkali dhe egjiptian.

“Ndërsa 100 të rinjve, me prioritet atyre nga komunitetet joshumicë,  iu është dhënë mundësia për praktikë 6 mujore me pagesë në institucionet qeveritare. Kemi filluar edhe zbatimin e Skemës së Punësimit të Garantuar për të Rinjtë, Superpuna, andaj i inkurajoj të gjitha të rejat dhe të rinjtë nga komuniteti rom, që të aplikojnë në këtë platformë”, thuhet ndër të tjera në njoftim. /Telegrafi/