Rexhepi: Përmirësimi i kushteve të romëve është prioritet për Ministrinë e Transportit dhe Lidhjeve

Zëvendësministri i Transportit dhe Lidhjeve, Bekim Rexhepi, mori sot pjesë në konferencën me temë “Strategjia për romët, progresi dhe hapat e ardhshëm”, organizuar nga Kabineti i Presidentit. Ai tha se vendi ynë mund të mburret me synimet e saj për integrimin e romëve në vend.

“Republika e Maqedonisë së Veriut gjithmonë mund të mburret me synimet e saja të sinqerta për integrimin e romëve. Kjo dëshmohet edhe nga përmendja e romëve në Kushtetutë, strategjitë dhe planet e veprimit dhe ndarja e burimeve financiare për romët”.

“Nuk është një kërkesë për ndihmë, por një pozicionim i arsyeshëm për të arritur qëllimin tonë me vizion, intelekt, guxim dhe besnikëri në shoqëritë ku jetojmë. Ne duhet t’i qasemi asaj jo nga një pozicion dobësie, dëshpërimi, por nga një vend dinjiteti, vlere dhe fuqie”, tha Rexhepi.

Në Planin Strategjik të Ministrisë së Transportit dhe Lidhjeve, për 2022-2025 janë përcaktuar prioritetet strategjike, duke përfshirë prioritetin e përmirësimit të infrastrukturës rezidenciale dhe asaj komunale të romëve në vendin tonë.