Kapet me armë automatike dhe municione, arrestohet një person në Tropojë

Policia e Tropojës ka arrestuar një person në banesën e të cilit u gjet një armë zjarri automatike dhe një sasi municioni luftarak.

Shtetasi me inicialet D. H., banues në fshatin Degë, u ndalua në flagrancë nën akuzat për “Mbajtje pa leje dhe prodhim të armëve, shpërthyese dhe municionit luftarak”.

Materialet i hetimore i kaluan Prokurorisë pranë Gjykatës së Shkallës së Parë Tropojë, për veprime të mëtejshme.

“Në vijim të punës për goditjen e rasteve të armëmbajtjes pa leje, bazuar dhe në informacionet e siguruara për një rast të kësaj veprimtarie kriminale, shërbimet e Komisariatit të Policisë Tropojë kanë organizuar punën dhe kanë ushtruar kontroll në banesën e shtetasit D. H., në fshatin Degë.

Shërbimet e Policisë, gjatë kontrollit të ushtruar në banesë, gjetën dhe sekuestruan në cilësinë e provës materiale një armë zjarri automatik dhe një sasi municioni luftarak, të cilat ky shtetas i mbante pa leje.

Në vijim të veprimeve u arrestua në flagrancë, për veprën penale “Mbajtja pa leje dhe prodhimi i armëve, armëve shpërthyese dhe i municionit”, shtetasi D. H., banues në fshatin Degë, Tropojë”, thuhet në njoftimin e policisë. /Telegrafi/