Kica-Xhelili: Haxhiu është zyrtarisht shkelësja e Kushtetutës, që dikur e përçmonte si tradhti kombëtare

Deputetja e Lidhjes Demokratike të Kosovës, Doarsa Kica-Xhelili, ka thënë se ministrja e Drejtësisë, Albulena Haxhiu, është zyrtarisht shkelësja e Kushtetutës së vendit, “që dikur e përçmonte si tradhti kombëtare”.

Kjo pasi Gjykata Kushtetuese të premten e shpalli të pavlefshëm Ligjin për Ndryshimin dhe Plotësimin e Ligjit për Këshillin Prokurorial të Kosovës (KPK).

Lexo po ashtu Haxhiu për vendimin e Gjykatës Kushtetuese: Për ta më i rëndësishëm është interesi individual i anëtarëve të KPK-së

E Kica-Xhelili e ka përmendur rrëzimin e Qeverisë Hoti dhe 22 shkeljet që Kushtetuesja i ka gjetur në marrëveshjen e vitit 2013 për Asociacionin, vendime këto që sipas deputetes, i shkuan përshtati Vetëvendosjes e tash Haxhiu po befasohet po nga kjo gjykatë.

“Paska filluar ta vë në pyetje kredibilitetin e GJK. Natyrisht. Sepse sot, ajo është zyrtarisht shkelësja e Kushtetutës që dikur e përçmonte si tradhëti kombëtare – dhe i dhemb rruga që ka shtruar vet me kolegë”, ka shkruar ajo në Facebook.

“I paska rënë ndërmend se në pushtet paska ndonjëherë edhe njerëz që gabojnë, jo monstrumë. Megjithëse duke i njohur – këta nuk gabojnë pa qëllim. Për Ministren nuk qenka më GJK e mirë. Ndryshon puna tash”.

Gjykata Kushtetuese e ka shpallur të pavlefshëm Ligjin për Këshillin Prokurorial të Kosovës, pas kërkesës për vlerësim të kushtetutshmërisë së tij nga deputetët e Partisë Demokratike të Kosovës dhe Lidhjes Demokratike të Kosovës, vitin e shkuar.

Gjykata ka konstatuar se disa nene të këtij ligji nuk janë në përputhje me Kushtetutën e Kosovës. Sipas vendimit të Kushtetueses, ligji bie ndesh me nenet e Kushtetutës për Formën e Qeverisjes dhe Ndarjen e Pushtetit, Kompetencat e Kuvendit, Rolin e Avokatit të Popullit, Barazinë para Ligjit, e nenin për Këshillin Prokurorial. /Telegrafi/