“Serbia kthehet nga Ohri destruktive”, shefi i Kabinetit të Konjufcës del me një deklaratë derisa takimi po vazhdon

Ilir Kërçeli, shef i Kabinetit të kryetarit të Kuvendit të Kosovës, Glauk Konjufca, ka thënë se Serbia po kthehet nga Ohri destruktive.

Këtë deklarim ai e ka bërë në llogarinë e tij në Facebook, teksa takimi trelateral në Ohër po vazhdon ende.

Lexo po ashtu Vazhdojnë bisedimet, Kurti dhe Vuçiq i rikthehen takimit në Ohër

Kërçeli tutje është shprehur se nuk ka Asociacion i cili e shkel Kushtetutën, e cenon integritetin dhe sovranitetin e Kosovës.

“Serbia kthehet nga Ohri, destruktive si gjithmonë. Veç kësaj radhe do e marrë edhe koston e merituar”, ka shkruar ai.

Ndryshe, kryeministri i Kosovës, Albin Kurti, dhe presidenti i Serbisë, Aleksandar Vuçiq, po vazhdojnë takimin në Ohër.

Dy udhëheqësit po takohen me ndërmjetësimin e zyrtarëve të BE-së për të diskutuar zbatimin e një plani evropian për normalizimin e marrëdhënieve mes dy vendeve.

Fillimisht përfaqësuesi i Lartë i Bashkimit Evropian, Josep Borrell ka mbajtur takimin me presidentin e Serbisë, Aleksandar Vuçiq, ndërkaq me pas edhe me kryeministrin e Kosovës, Albin Kurti.

Pas takimit bilateral, diku rreth orës 15:30 ka filluar takimi trepalësh ndërmjet Borrelit, Kurtit dhe Vuçiq.

E zëdhënësi i BE-së, Peter Stano në një deklaratë për media theksoi se në fund të takimit, përfaqësuesi i Lartë, Borrell do të dalë me një deklaratë për media.

Ai tha se kjo deklaratë pritet të bëhet në orët e mbrëmjes. / Telegrafi/