Vrapçishti dhe Bogovina po bëhen me Qendër Zjarrfikëse, do të ndahen nga Komuna e Tetovës dhe Gostivarit

Vrapçishti dhe Bogovina së shpejti do të kenë qendrën e tyre zjarrfikëse, e cila po ndërtohet mes këtyre dy komunave. Kështu ato do të duhet të ndahen nga komuna e Tetovës dhe Gostivarit, njësite zjarrfikëse të të cilave veprojnë në këto komuna në rast zjarresh.

Qendra rajonale është duke u ndërtuar, ndërsa projekti kap vlerën një milion euro. Financohet me mjetet te buxhetit dhe BE-së.

“Sipas dokumentacionit teknik këtë verë duhet të përfundojë dhe të fillojë të funksionojë”, tha Risto Penov, ministër për Vetëqeverisje Lokale.

“Projekti parasheh që të kemi një makinë zjarrfikëse. Muajin e ardhshëm do të bëhet shpallja për të dhe kuptohet për pjesën tjetër ne me komunën e Bogovinës duhet që të bëjmë disa hapa në këtë drejtim, bashkë me Ministrinë e Mbrojtjes kur ne duhet të shkëputemi nga Tetova dhe Gostivari dhe të formojmë qendrën tonë të përbashkët Bogovinë-Vrapçisht”, theksoi Isen Shabani, kryetar i komunës së Vrapçishtit.

“Pas ndërtimit të këtij objekti të dy komunave ta pret punë edhe më e rëndë. Duhet të themelohet ky institucion dhe të fillojmë të fitojmë bllok dotacione nga Ministria e Mbrojtjes. Vështirësinë më të madhe do ta kemi më tej, ata punëtorë që do të punësohen duhet të marrin rroga. Do të mundohemi maksimalisht që në bazë të ligjeve të parapara të fitojmë bllok dotacione nga Ministria e Mbrojtjes”, tha Besnik Emshiu, kryetar i Bogovinës./TV21/