Mos ndoshta këto cilësi të karakterit po të dëmtojnë?

Ndonjëherë, rutina dhe përditshmëria na marrin përpara dhe në njëfarë mënyre harrojmë të ndalojmë për një çast dhe të kuptojmë se çfarë na bën mirë dhe çfarë na dëmton

E në shumë raste, në dëmin tonë mund të jenë edhe disa veçori të cilat karakterizohen si “cilësi” të personalitetit:

Një sens humori i pashëndetshëm

Në shumë raste, sensi i humorit çliron tensionin dhe të ndihmon të kesh një qasje më pozitive ndaj jetës dhe situatave të ndryshme, megjithatë, jo gjithnjë ndodh kjo. Për shembull, shumë njerëz dëmtojnë vetëbesimin duke gjykuar, me humor, pamjen e jashtme apo duke diskutuar një traumë fëmijërie, në mënyrë që të dhurojnë të qeshura.

Sipas psikologes Chloe Lau në universitetin “Western”, Kanada, sensi i humorit mund të përdoret edhe për të shpëtuar nga ndjesitë jo dhe aq të mira dhe kështu, njerëzit që mbulojnë emocionet me humor, nuk arrijnë të përballojnë ndjesitë e tyre.

Një tjetër mënyrë se si sensi i humorit mund të të dëmtojë lidhet me manipulimin, pasi shumë persona priren të përdorin strategji të ndryshme, të cilat kombinuar me sensin e humorit, arrijnë të manipulojnë apo sugjestionojnë njerëzit përreth.

Fiksimi me punën

Është pak e vështirë të kuptohet nëse një person është i përgjegjshëm dhe profesionist, apo super i fiksuar me punën, sidomos në kultura ku dikush që është gjithë kohës në punë, vlerësohet shumë.

Por, njerëzit që janë të fiksuar me punën përjetojnë më shumë ankth, stres dhe emocione negative, duke sjellë më pas edhe ngërç në produktivitet.

Jeton më shumë në kokën tënde sesa në realitet

Është në rregull të kesh “botën tënde”, por mos ndoshta po ëndërron gjatë ditës dhe po shkëputesh nga realiteti? Kur kjo kthehet në patologji, mund të të dëmtojë.

Sipas psikologes Eli Somer: “Ëndrrat gjatë ditës janë fantastike, shumë të gjalla dhe në disa raste, lidhen edhe me sëmundje mendore”, citon Anabel.

Në shumë momente, është shumë pozitive të imagjinosh dhe të arratisesh për pak sekonda nga realiteti, por kur këto “arratisje” bëhen më të shpeshta se duhet, ndoshta duhet ta trajtosh si problematikë (për të cilën, sigurisht, duhet të konsultohesh me profesionist). /Telegrafi/