Berisha mban fjalën në protestën para Kuvendit: Lëvizje e fuqishme shqiptare

Kreu i Partisë Demokratike, Sali Berisha ka mbajtur fjalën e tij në protestën që po mbahet para Kuvendit, aty ku po zhvillohet dhe seanca plenare.

Berisha tha se Kuvendi duhet të jetë tempulli i demokracisë dhe jo bunkeri i fjalës së ndaluar.

“Në këtë protestë të jashtëzakonshme, në të cilën ju nuk protestoni për disa deputetët të PD, as dhe për PD por protestoni, jo vetëm për zgjedhësit që votuan kundër Ramës por protestoni për çdo shqiptar. Jeni këtu sot për çdo shqiptar që beson që Kuvendi duhet të jetë tempulli i demokracisë dhe jo bunkeri i fjalës së ndaluar”, tha ai.

Berisha deklaroi gjithashtu se “ky nuk është revolucion i opozitës, por lëvizje e fuqishme shqiptare”.

“Kjo protestë nuk është për Partinë Demokratike, por për 750 mijë shqiptarët që votuan kundër Ramës dhe për çdo shqiptar i cili ka në vetëdijen e tij idealet e lirisë. Jeni këtu sot për çdo shqiptar i cili beson se Parlamenti duhet të jetë tempulli i demokracisë dhe jo bunkeri i fjalës së ndaluar. Protestoni sot për çdo shqiptar i cili beson, pavarësisht se për cilën forcë politike ka votuar, se ata që përfaqësojnë opozitën janë aty për t’ia thënë të vërtetat në sy qeverisë”, tha Berisha.

“Shqiptarët duan të dinë të vërtetën e vjedhjes së këtyre qeveritarëve. Këta vjedhin çdo ditë, këta i urrejnë qytetarët. Ky nuk është revolucion i PD-së, por lëvizje e fuqishme shqiptare”, shtoi kreu i Partisë Demokratike. /Telegrafi/