Përplasi për vdekje të moshuarën në mes të Tiranës, Policia arreston shoferin

Policia e Tiranës ka vënë në pranga një 23-vjeçar, i cili ditën e djeshme aksidentoi me automjetin e tij një të moshuar, teksa kalonte rrugën në bulevardin “Zhan D’ark” në Tiranë.

Fillimisht, e moshuara u dërgua në spital, por fatkeqësisht ndërroi jetë pak orë pas ngjarjes. Ndërkohë, shoferi iu nënshtrua testit të drogës, ku pas verifikimeve, rezultoi se në momentin e aksidentit ka qenë nën efektin e lëndëve narkotike.

“Arrestohet drejtuesi i automjetit që aksidentoi një 75-vjeçare, e cila për shkak të dëmtimeve, ndërroi jetë në spital, ditën e djeshme. Pas testimit me aparatin AquilaScan, drejtuesi i automjetit ka rezultuar nën efektin e lëndëve narkotike.

Specialistët e Qarkullimit Rrugor kanë arrestuar në flagrancë shtetasin M. A., 23 vjeç, banues në Tiranë, pasi ditën e djeshme, rreth orës 16:00, duke drejtuar automjetin, në bulevardin “Zhan D’Ark”, ka aksidentuar shtetasen D. K., 75 vjeçe, banuese në Tiranë, e cila më pas ka ndërruar jetë, në spital.

Pas testimit me aparatin AquilaScan, ka rezultuar se drejtuesi i automjetit, shtetasi M. A., ishte nën efektin e lëndëve narkotike. Materialet i kaluan Prokurorisë, për veprat penale “Drejtimi i automjeteve në mënyrë të parregullt” dhe “Shkelja e rregullave të qarkullimit rrugor”, me pasojë vdekjen.” /Telegrafi/