Pas pagës, kryeministri i Malajzisë refuzon edhe ‘Mercedes S600’ si makinë zyrtare

Kryeministri i Malajzisë, Anwar Ibrahim, ka refuzuar përdorimin e një limuzine Mercedes-Benz S600 të blerë së fundmi si makinën e tij zyrtare.

Në vend të kësaj, ai tha se do të përdorë çdo automjet në dispozicion në Departamentin e Kryeministrit për detyrat e tij, shkruajnë mediat e huaja, përcjell Telegrafi.

“Dëshiroj t’ju informoj se dje, kam refuzuar të përdor një automjet Mercedes S600 që është blerë dhe marrë nga Departamenti i Kryeministrit para se të merrja detyrën”, shkroi ai në një postim në Facebook të dielën (27 nëntor).

“Lëvizja u mor sepse nuk dua që të më bëhen shpenzime të reja”.

Të shtunën mbrëma, ai kishte bërë një deklaratë të ngjashme pas lutjeve në një xhami në Selangor.

Ai tha se nuk do të blihet asnjë makinë e re zyrtare për përdorimin e tij dhe asnjë mobilie e re e panevojshme nuk do të blihet nga zyra e tij, si pjesë e një kulture të re kundër shpërdorimit të fondeve publike që duhet praktikuar nga të gjithë.

Anwar, 75 vjeç, njoftoi më parë se ai nuk do të merrte pagën e tij të kryeministrit, në përputhje me një premtim që ai kishte bërë gjatë fushatës së Zgjedhjeve të Përgjithshme.

Ai bëri të ditur gjithashtu se do të zvogëlohet kabineti dhe se po kërkon edhe marrëveshjen e deputetëve që do të emërohen ministra për uljen e pagave.

Ai ende nuk e ka shpallur përbërjen e tij të kabinetit dhe tha të dielën se do të diskutojë emërimet me partnerët e tij të koalicionit në ditët në vijim.

Pasi u emërua kryeministër të enjten e kaluar, Anwar tha se prioriteti i tij i parë ishte të trajtonte inflacionin dhe koston në rritje të jetesës për të lehtësuar barrën financiare për qytetarët.

Të dielën, ai njoftoi se Malajzia do të rishikojë programin e saj të subvencioneve qeveritare për të synuar më mirë grupet me të ardhura të ulëta.

Anwar u betua si kryeministri i 10-të i Malajzisë të enjten e kaluar pas një bllokimi politik, ku asnjë nga koalicionet nuk komandonte shumicën e vendeve në parlament. /Telegrafi/