Al Shabab merr përgjegjësinë pas të shtënave me armë dhe një shpërthimi në një hotel pranë pallatit presidencial të Somalisë

Grupi terrorist Al Shabab ka marrë përgjegjësinë për një sulm të armatosur të ndodhur në një hotel në kryeqytetin somalez.

Sipas mediave të huaja, përcjell Telegrafi, Al Shabab tha se militantët e saj sulmuan hotelin Villa Rose, i cili ka një restorant të njohur ku qëndrojnë zyrtarë të qeverisë dhe sigurisë.

Abdi Hassan, një punonjës i qeverisë që jeton pranë hotelit, i tha agjencisë së lajmeve Associated Press se ai beson se disa zyrtarë qeveritarë ishin brenda hotelit kur filloi sulmi.

Madje sipas tij, disa u panë duke u hedhur nga muri rrethues për të shpëtuar.

Hoteli nuk është shumë larg nga pallati presidencial në qendër të Mogadishu, ku u dëgjua një shpërthim, i ndjekur nga të shtëna me armë zjarri.

Për fat të mirë nuk ka pasur të dhëna të menjëhershme për viktima.

Muajin e kaluar të paktën 120 njerëz u vranë në dy shpërthime me makina bombë në një kryqëzim të frekuentuar në Mogadishu.

Al Shabab, i cili zakonisht nuk merr përgjegjësinë kur sulmet e tij rezultojnë në një numër të lartë të vdekjeve civile, besohet se e ka kryer atë sulm, më vdekjeprurës që nga një sulm i ngjashëm në të njëjtin vend ku ishin vrarë më shumë se 500 njerëz, pesë vjet më parë. /Telegrafi/