Gjukanoviq: Bota ruse është e barabartë me botën serbe

Presidenti malazez, Milo Gjukanoviq deklaroi se “ajo që ndodhi në Mal të Zi në vitin 2016 ishte nën të njëjtin titull politik si agresioni i Rusisë kundër Ukrainës”.

“Për vite me radhë Rusia është përgatitur intensivisht për idenë e revizionizmit historik, për të arritur që Rusia e sotme të jetë po aq e rëndësishme sa Bashkimi Sovjetik. Prandaj u promovua ideja e “botës ruse”, e cila në Ballkan u përsërit si ‘bota serbe”, tha Gjukanoviq në Forumin e Integrimit Ballkanik.

Sipas tij, Rusia po përgatitej për një revizionizëm dhe askush në Perëndim, veçanërisht në Evropë, nuk e mori seriozisht, raporton vijesti.me.

“Pse ndodhi kjo në Mal të Zi në vitin 2016? Mali i Zi ishte në derën e NATO-s atë vit. Ideja ishte të ndalonin Malin e Zi të anëtarësohej në NATO. Ne i rezistuam dhe iu bashkuam NATO-s, por Rusia vazhdoi të zhvillonte modelin e shkatërrimit hibrid në Ballkan. Ka zhvilluar dy baza hibride – njëra është, mund ta merrni me mend, Serbia dhe tjetra është Republika Srpska. Ju keni një prani të fortë të mediave ruse, agjencive të tyre të inteligjencës dhe sigurisë, ekonomisë, abuzimit të ortodoksëve serbë”, tha ai.

Duke folur në panelin presidencial, të titulluar “Pozicionimi i Ballkanit Perëndimor në marrëdhëniet globale në dritën e krizës ukrainase”, Gjukanoviq tha se Rusia po shfrytëzon një “repertor brutal” në Ukrainë.

Ai theksoi se në Mal të Zi nuk ka rusofobi dhe se para 11 vjetëve “shënuam tre shekuj të marrëdhënieve ndërshtetërore dhe sot jemi në listën e vendeve armike”. /Telegrafi/