Ish-diplomati polak: NATO-ja është larg aktivizimit të Nenit 5

NATO është ende shumë larg nga aktivizimi i Nenit 5, tha Robert Pszczel, bashkëpunëtor i lartë në Fondacionin Casimir Pulaksi dhe ish-diplomat polak.

Duke folur për Sky News, Pszczel tha se Polonia ishte e “kujdesshme për të mos ngritur aksionet dhe për të mos shkuar drejt përshkallëzimit”, transmeton Telegrafi.

I pyetur nëse sulmi i fundit mund të aktivizojë Nenin 4 apo 5, ai tha: “Mendoj se jemi shumë larg aktivizimit të Nenit 5, pasi kjo do të përfshinte një sulm të paramenduar. Presidenti Polak tha se shpresojmë se ky është një incident i izoluar, por megjithatë është serioz pasi siguria e një aleati dhe siguria e tjerëve është në rrezik”.

“Përshkallëzimi nuk është në interesin e askujt, por të njëjtën kohë nuk mund të vazhdojë më kështu. Rusia nuk mund të kërcënojë dhe të vrasë drejtpërdrejtë ose tërthorazi njerëzit në Evropë”, shtoi ai.

Ish-diplomati polak këmbënguli se pavarësisht nëse një raketë ruse goditi Poloninë apo ishte një raketë ukrainase duke u përpjekur të mbronte territorin e saj, kjo nuk do të ndodhte po të mos kishte filluar lufta e pamatur dhe barbare e Rusisë.

“Duket se në këtë moment mënyra më e mirë për ta ndaluar këtë, është të sigurohemi që Ukraina të fitojë në fushëbetejë”, shtoi Pszczel.

Neni 5 është ndoshta pjesa më e famshme e Traktatit të Aleancës Veri-Atlantike – parimi i mbrojtjes kolektive që do të thotë se një sulm ndaj një anëtari konsiderohet një sulm ndaj të gjithëve. /Telegrafi/