Ikte nga policia dhe u fsheh në vilën e presidentit – hajni u fut në pronën më të sigurtë në Gjermani

Duke tentuar t’i ikë policisë, një person i dyshuar për vjedhje – tentoi të fshihet në rezidencën e presidentit gjerman në Bon.

Siç raportojnë mediat gjermane, hajni kishte tentuar të fshihet nga policia në vilën Hamershmit, një nga objektet më të ruajtura në Gjermani.

Për këtë arsye u janë nevojitur vetëm pak minuta që policia ta lokalizojë dhe arrestojë, transmeton Telegrafi.

Nga policia gjermane, agjencisë DPA i është thënë se gjithçka ka ndodhur kur presidenti gjerman Frank-Walter Steinmeier, e kaloi natën në atë vilë për shkak të disa takimeve që i kishte pasur.

Policia ka bërë të ditur se për asnjë moment nuk ka pasur rrezik për kreun e shtetit gjerman.

Hajni me sa duket nuk e ka ditur se në pronën e kujt ishte futur, kur kërceu rrethojën duke ikur nga policia. Ata e kishin gjetur duke tentuar të fshihet në bari.

Ndryshe për të ishte lëshuar urdhër-arrest për vjedhje të veturave, e tani i ngarkohet një akuzë e re – për hyrje pa leje në pronë private. /Telegrafi/