Connecticut: 30 vjeçari shqiptar zgjidhet në Asamblenë e Shtetit

Amerikanët votuan pa probleme madhore të martën në zgjedhjet e mesmandatit.

Komuniteti shqiptaro-amerikan ka se me çfarë të krenohet pas ditës së zgjedhjeve në Shtetet e Bashkuara.

Joe (Xhoi) Hoxha është pjesëtari i komunitetit i zgjedhur për të përfaqësuar distriktin e Shtëpisë së 78-të të Konektikatit, që mbulon qytetet Plymouth dhe Bristol, në Asamblenë e Përgjithshme të Konektikatit.

Joe Hoxha ka lindur në Tiranë, Shqipëri dhe ishte 3 vjeç kur familja e tij emigroi në Shtetet e Bashkuara, ku u vendos në Bristol, Connecticut ku Joe jeton aktualisht.

Ai  studioi në Universitetin e Connecticut ku u diplomua me një diplomë bachelor të dyfishtë në Shkenca Politike dhe Sociologji.

Politika ka qenë gjithmonë një interes i tij, dhe Joe ka punuar në fushata politike në të gjithë Shtetet e Bashkuara, duke përfshirë Teksas, Virxhinia, Nju Hampshire, Misuri dhe në Konektikat, duke u rritur nga një drejtor në terren në menaxher fushate.

Ai punon në industrinë e shërbimeve financiare, aktualisht i punësuar në një bankë të komunitetit lokal.

Joe fitoi zgjedhjet paraprake republikane në gusht 2022, duke kapur 75% të votave dhe siguroi nominimin republikan për zgjedhjet e përgjithshme, ku kandidoi pa kundërshtar.

Me Joe që do t’i bashkohet Asamblesë së Përgjithshme të Konektikatit vitin e ardhshëm në moshën 30 vjeç, ai i bashkohet numrit të vogël të shqiptaro-amerikanëve që janë zgjedhur për të shërbyer në një asamble shtetërore dhe me gjasë shqiptaro-amerikani i parë që e bën këtë në Konektikat, raporton Illyria.