Begaj kundër deklaratës zyrtarëve britanik: Të bëjë të mundur që qytetarët të ikin me viza të rregullta, si punëtorë sezonalë

Presidenti i Shqipërisë, Bajram Begaj ka reaguar sot nga Kukësi për etiketimet e zyrtarëve britanikë ndaj shqiptarëve, të cilët përbëjnë numrin më të madh të emigrantëve të paligjshëm që kanë kaluar këtë vit Kanalin e La Manshit, nga Franca drejt Anglisë.

Ai i është referuar deklaratave të Sekretares së Punëve të Brendshme në Britani, Suella Braverman, e cila ka folur për “pushtim” nga emrigrantët.

“Nuk mund të anatemohen dhe të etiketohen si pushtues për faktin që shqiptarët jetojnë e punojnë kudo në botë, janë integruar në shumë vende të botës dhe kanë ndërtuar jetën dhe punuar në mënyrë normale, duke paguar taksa”, tha Begaj.

“Nuk është e drejtë të bullizohen. Natyrisht ka edhe elemente anësore të padëshiruara, që mund të kenë lidhje me krimin, por si këto nuk janë vetëm shqiptarë”.

Begaj tha se i ka kërkuar qeverisë britanike që investimet e saj t’i bëjë në drejtim të zonave ku ka emigrantë.

“Rruga e duhur është që investimet të bëhen të prekshme nga qytetarët, të mos jenë vetëm në kuadrin e këshillimeve, por të jenë investime me qëllim që këta qytetarë që ikin për një jetë më të mirë, të punojnë e të jetojnë në Kukës, Dibër, Has e Tropojë”.

Begaj tha gjithashtu se i ka kërkuar Mbretërisë së Bashkuar që të hapë një konsullatë në Kukës dhe të bëjë të mundur që qytetarët të ikin me viza të rregullta, si punëtorë sezonalë. /Telegrafi/