Nëse liderët arrijnë marrëveshje, do të duhen të paktën tre muaj e gjysmë për ndryshimet kushtetuese në RMV

Sipas afateve sa më të shkurtra, duhen të paktën tre muaj e gjysmë për të finalizuar tre fazat e procedurës për ndryshimin e Kushtetutës.

Në fazën e parë, Kuvendi me dy të tretat e shumicës duhet të marrë vendim për qasje në ndryshimin e Kushtetutës. Në fazën e dytë do të përcaktohen projekt-amendamentet dhe për këtë nevojitet një shumicë e thjeshtë ose 61 vota, ndërsa faza e tretë dhe e fundit përfshin miratimin e amendamenteve që kërkon shumicë prej dy të tretave ose mbështetjen e së paku 80 deputetëve. Nëse procedura zhvillohet sipas afateve sa më të shkurtra, do të duhen të paktën tre muaj e gjysmë për të finalizuar tre fazat, përcjell Telegrafi Maqedoni.

Kushtetuta e Republikës së Maqedonisë ndryshohet dhe plotësohet me amendamente kushtetuese. Propozim për qasje në ndryshimin e Kushtetutës mund të paraqesin Presidenti i Republikës, Qeveria, së paku 30 deputetë ose 150.000 qytetarë. Vendimin për qasje në ndryshimin e Kushtetutës e merr Kuvendi me shumicën e dy të tretave të votave nga numri i përgjithshëm i deputetëve. Draftin për ndryshimin e Kushtetutës e përcakton Kuvendi me shumicën e votave nga numri i përgjithshëm i deputetëve dhe e vendos për diskutim publik. Vendimin për ndryshimin e Kushtetutës e miraton Kuvendi me shumicën e dy të tretave të votave nga numri i përgjithshëm i deputetëve. Amendamenti i Kushtetutës shpallet nga Kuvendi.

Sipas Rregullores së Kuvendit, faza e parë e ndryshimeve në Kushtetutë mund të zgjasë maksimumi 20 ditë pune. Në Komisionin për Çështje Kushtetuese mund të debatohet maksimumi dhjetë ditë në seancë plenare të Kuvendit. Çdo deputet mund të flasë disa herë, si brenda Komisionit ashtu edhe në seancë plenare, por jo më shumë se 20 minuta në total.

Nëse Kuvendi në seancë plenare me së paku 80 vota merr vendim për hapjen e Kushtetutës për ndryshimin e saj, kalon në fazën e dytë – përgatitjen dhe përcaktimin e projekt-amendamenteve. Nga momenti i paraqitjes në Kuvend të projekt-amendamenteve deri në mbajtjen e seancës plenare për miratimin e tyre duhet të kalojnë të paktën 30 ditë.

Shqyrtimi i secilit projekt-amendament individualisht mund të zgjasë maksimumi tre ditë si në Komision ashtu edhe në seancë plenare.

Pasi Kuvendi me të paktën 61 vota përcakton projekt-amendamentet, ato kalojnë në diskutim publik, që është fazë e ndërmjetme përpara fazës së tretë përfundimtare të procedurës për ndryshimin e Kushtetutës. Pas diskutimit publik, kohëzgjatjen e të cilit e cakton Kuvendi me miratimin e projekt-amendamenteve, Qeveria do të duhet të përgatisë amendamentet e propozuara. Nga momenti i paraqitjes në Kuvend të propozim-amendamenteve deri në mbajtjen e seancës plenare për miratimin e tyre duhet të kalojnë të paktën 30 ditë.

Rregullorja parashikon afate të sakta për kontrollin në Komisionin Ligjvënës dhe në Komisionin për Çështje Kushtetuese, si dhe në seancë plenare. Vendimi përfundimtar për miratimin e amendamenteve merret me së paku 80 vota, kurse për ndryshimin e Preambulës, përveç shumicës prej dy të tretash, kërkohet edhe shumica e Badenterit./Telegrafi/