Eurodeputeti Mandl: Dialogu Prishtinë-Beograd është ndërmjet dy shteteve, jo qyteteve – BE-ja duhet ta bëjë këtë të qartë

Eurodeputeti austriak Lukas Mandl tha të premten se dialogu ndërmjet Prishtinës dhe Beogradit është dialogu mes dy shteteve dhe jo ndërmjet dy qyteteve.

Mandl këto komente i bëri në Kuvendin e Kosovës, ku po mbahet sesioni i dytë i punës i Komisionit Parlamentar për Stabilizim Asocim BE-Kosovë.

“Agjenda thotë dialogu mes Prishtinës dhe Beogradit.. E njoh këtë gjuhë shumë mirë, por besoj se ky nuk është dialog mes dy qyteteve… duhet ta bëjmë të qartë në fillim se është e është dialog mes dy shteteve, shtetit të Kosovës dhe Serbisë”, tha ai, duke shtuar se edhe BE duhet ta theksojë këtë çështje, raporton Telegrafi.

Sipas tij, është e rëndësishme që Bashkimi Evropian e ndërmjetëson dialogun, ndërsa shtoi se “mund të jenë konstruktiv por edhe kritik si po vazhdon dialogu”.

“Ne nuk duhet të nënvlerësojmë rolin pozitiv të SHBA-së në dialogun, në mbështetjen e vërtetë të dialogut të ndërmjetësuar nga BE”, tha ai.

Ai ka folur edhe për çështjen e liberalizimit të vizave, duke thënë se Kosova ka përmbushur të gjitha kriteret dhe kjo është konfirmuar disa herë nga Komisioni Evropian.

“Dje kolegu ynë Haki Abazi tha se çështja e liberalizimit të vizave mund të përdoret si levë në dialogun Kosovë-Serbi… Shpresoj që kjo nuk është e vërtetë sepse do të ishte e padrejtë për Kosovën”, tha ai.   /Telegrafi/