Televizioni shtetëror iranian transmeton një video “të çiftit francez të akuzuar për spiunazh”

Televizioni shtetëror iranian ka transmetuar një video në të cilën dy shtetas francezë të arrestuar për “spiunim” në Iran në maj duket se rrëfejnë se kanë vepruar në emër të një shërbimi francez të sigurisë, mes disa javësh trazirash që Teherani i ka lidhur me armiqtë e huaj.

Siç shkruan TRT World, përcjell Telegrafi, të enjten, Ministria e Jashtme e Francës akuzoi Iranin për praktikat e “regjimeve më të këqija diktatoriale” mbi rrëfimet e videove dhe mohoi kategorikisht se të dy ishin anëtarë të shërbimeve të inteligjencës franceze.

Ndryshe, Ministria e inteligjencës e Iranit tha në maj se kishte arrestuar dy evropianë për gjoja nxitjen e “pasigurisë” në Iran.

E Franca ka dënuar dhe ka kërkuar lirimin e menjëhershëm të Cecile Kohler dhe partnerit të saj Jacques Paris.

“Unë jam Cecile Kohler, unë jam një agjent i inteligjencës dhe operacioneve në DGSE (Drejtoria e Përgjithshme për Sigurinë e Jashtme)… Ne ishim në Iran për të përgatitur terrenin për revolucionin dhe përmbysjen e regjimit të Iranit Islamik”, citohet të ketë thënë Kohler në video teksa mban shami.

#Iran’s state TV has produced a documentary about two French nationals recently arrested by Iranian Intelligence Ministry. Part of the documentary shows the two saying they work for #France’s foreign intelligence agency (DGSE) & that they came to support protests & regime change. pic.twitter.com/L6DRZEdZDA

— Abas Aslani (@AbasAslani) October 6, 2022

Televizioni shtetëror citohet të ketë thënë se dy shtetasit francezë kishin hyrë në Iran me “copa parash… të cilat kishin për qëllim financimin e grevave dhe demonstratave”.

“Qëllimi ynë në shërbimin francez të sigurisë është të bëjmë presion ndaj qeverisë së Iranit”, citohet më tej Paris.

Në maj, televizioni shtetëror transmetoi një video të çiftit duke thënë se ata udhëtuan në Iran si turistë “por ata morën pjesë në protesta anti-qeveritare dhe takuan anëtarë të të ashtuquajturës Shoqata e Mësuesve”, duke iu referuar protestave të mësuesve iranianë në të gjithë vendin – që kërkonin paga dhe kushte më të mira pune.

“Rrëfimi” përkon me protestat e javëve antiqeveritare në Iran për vdekjen e 22-vjeçares Mahsa Amini në paraburgimin e policisë muajin e kaluar.

Protestat mbarëkombëtare kanë marrë mbështetje të gjerë ndërkombëtare, duke bërë që Teherani të sulmojë kritikët e tij duke akuzuar Shtetet e Bashkuara dhe Izraelin se po shfrytëzojnë trazirat në përpjekje për të destabilizuar Republikën Islamike. /Telegrafi/