Thomas Tuchel do të përballet me deportim nga Britania e Madhe pas shkarkimit nga Chelsea

Thomas Tuchel u shkarkua nga Chelsea pas fillimit të dobët të sezonit të Bluve dhe u zëvendësua nga Graham Potter .

Trajneri gjerman tani është në kërkim të një pune të re dhe sipas ‘The Telegraph’, Tuchel është i interesuar të qëndrojë në Ligën Premier.

Megjithatë, Brexit po punon kundër tij, pasi ai mund të deportohet nga Britania e Madhe para Krishtlindjeve.

Trajneri gjerman mund të detyrohet të largohet nga Britania e Madhe për shkak të shkarkimit të tij nga Stamford Bridge.

Raportet në mediat angleze sugjerojnë se Tuchel mbërriti në vend me një vizë miratimi të organit qeverisës pas Brexit, që do të thotë se ai mund të qëndrojë në Mbretërinë e Bashkuar vetëm për 90 ditë pasi të jetë zyrtarisht i papunë.

Përfaqësuesi i Tuchel u pyet për situatën dhe nëse ajo po ndikon në perspektivat e ardhshme të punës së gjermanit.

“Ne do të veprojmë në përputhje me rregullat e Mbretërisë së Bashkuar dhe do të përshtatim të gjitha planet e ardhshme. Vendimet përfundimtare ende nuk janë marrë”, ka thënë përfaqësuesi i Tuchel për The Telegraph.

Ndërkohë, Tuchel po vazhdon të jetojë në Mbretërinë e Bashkuar dhe pret të shohë se çfarë mundësish pune do të krijohen.

Pavarësisht dëshirës së tij për të qëndruar në Ligën Premier, një rikthim në Bundesligë është gjithashtu një mundësi. /Telegrafi/