Ekonomi Biznes

Po mbahet ‘Java e Gjelbër dhe Digjitale’, organizuar nga Oda Ekonomike Gjermano-Kosovare

Para 2 vitesh

Oda Ekonomike Gjermano-Kosovare (OEGJK) nga 12 deri me 15 shtator është duke organizuar ngjarje të ndryshme në kuadër të “Javës së Gjelbër dhe Digjitale” (Green and Digital Week).

Drejtoresha menaxhuese e OEGJK-së, Nora Hasani theksoi rëndësinë e kësaj jave pasi që përveç diskutimeve me panelistë të dëshmuar në fushën e tyre, do të bëhet gjithashtu publikimi i tri raporteve të cilat do të trajtojnë digjitalizimin e proceseve biznesore te ndërmarrjet prodhuese në Kosovë, potencialin për energji të ripërtëritshme dhe analizën e modeleve të reduktimit të konsumit të energjisë në ndërtesat e banimit dhe mundësitë që iu ofrohen bizneseve nga këto modele.

Hasani ka potencuar se rekomandimet nga këto raporte do të adresohen te institucionet përkatëse.

Java ka filluar me një diskutim rreth bankimit digjital dhe tradicional ku panelistët të cilët janë të dëshmuar në sektorin e tyre si shefi ekzekutiv i Procredit Bank dhe i Raiffeisen Bank, drejtori për Mbikëqyrje Bankare në BQK, shefi i OneFor dhe Swinto dhe shefi i teknologjisë i Paysera, do të diskutojnë lidhur me ndikimin e digjitalizimit në industrinë e shërbimeve financiare, çfarë ndryshimesh kanë ndodhur dhe si këto ndryshime po mbështesin nevojat dhe funksionimin e sektorit privat.

Në ditën e dytë është diskutuar lidhur me rritjen e kapaciteteve konkurruese përmes digjitalizimit të proceseve të biznesit në Kosovë ku panelistët me ekspertizë të dëshmuar nga BERZH, Procredit Bank, Cacttus dhe Instituti Riinvest do të theksojnë mënyrat se si do të duhet lehtësuar dhe avancuar politikat dhe veprimet drejt digjitalizimit të proceseve të biznesit për komunitetin e NVM-ve në Kosovë.

Në të njëjtën ditë është bërë publikimi i raportit me titull “Rritja e kapaciteteve konkurruese përmes digjitalizimit të proceseve të biznesit në Kosovë”.

Në ditën e tretë do të diskutohet lidhur me mundësitë dhe sfidat e përdorimit të eficiencës së energjisë në ndërtesat e banimit. Panelistët me ekspertizë në sektorin e energjisë nga GIZ, Fakulteti i Inxhinierisë Elektrike dhe Kompjuterike/Universiteti i Prishtinës, MCC dhe ekspert të energjisë do të theksojnë sfidat e tregut për sektorin privat në sektorin e energjisë së pastër në Kosovë, por në të njëjtën kohë edhe potencialin që ofron ky sektor. Pritet të bëhet publikimi i raportit me titull “Modelet e reduktimit të konsumit të energjisë në ndërtesat e banimit”.

Në ditën e katërt do të diskutohet lidhur me parimet e Qeverisjes mjedisore, sociale dhe të korporatave (ESG) respektivisht Transparenca dhe shpalosja e informacionit. Paneli në përbërje të përfaqësuesit nga IFC, Procredit Bank, Shoqata e Kontabilistëve dhe Auditorëve të Certifikuar dhe kompanisë gjermane HPC International do të diskutojnë se si mund të përdoren kriteret e ESG për të inkurajuar kompanitë të veprojnë me përgjegjësi.