Një tjetër delegacion i Kongresit të SHBA-së viziton Tajvanin

Një tjetër delegacion i Kongresit të SHBA-së po viziton Tajvanin pasi tensionet me Kinën mbeten të larta lidhur me pretendimet e saj për ishullin e vetëqeverisur.

Një numër i vizitorëve amerikanë ka shkuar për t’u takuar me zyrtarë tajvanezë që kur kryetarja e Dhomës së Përfaqësuesve të SHBA-së, Nancy Pelosi e vizitoi në fillim të gushtit.

Kina si kundërpërgjigje ka rritur “ngacmimet e saj ushtarake”, duke dërguar çdo ditë anije luftarake, avionë luftarakë dhe madje edhe drone drejt ishullit.

I udhëhequr nga demokratja nga Florida, Stephanie Murphy, delegacioni u takua të enjten në mëngjes me presidentin tajvanez Tsai Ing-wen, administratën e të cilit Kina është përpjekur pa pushim të privojë nga njohja diplomatike dhe pjesëmarrja në organizatat ndërkombëtare.

Duke iu referuar kërcënimeve ushtarake të Kinës, Tsai tha se vizita e delegacionit “përçon mbështetje solide për Tajvanin nga Kongresi i SHBA-së”.

“Tajvani nuk do të përkulet para presionit apo detyrimit”, theksoi Tsai. “Ne do të mbrojmë institucionet tona demokratike dhe mënyrën e jetesës. Tajvani nuk do të tërhiqet”.

Murphy u përgjigj se Kongresi “duhet të avokojë për pjesëmarrje më të madhe tajvaneze në organizatat ndërkombëtare”.

“Tajvani e ka treguar veten të jetë një anëtar i përgjegjshëm i komunitetit ndërkombëtar, veçanërisht në çështjet e shëndetit publik, dhe meriton të marrë pjesë në forume ndërkombëtare kur është e përshtatshme”, ka thënë ajo.

Murphy është në mesin e ligjvënësve që prezantoi një projekt-ligj që do t’i lejonte SHBA-së të huazonte armë për të mbështetur Tajvanin, ngjashëm me një projekt-ligj që kishte miratuar për t’i dhënë armë Ukrainës.

Javën e kaluar, administrata e Joe Biden miratoi shitjen e armëve prej 1 miliard dollarësh për Tajvanin. /Telegrafi/