Fluks turistësh në Butrint, mbi 56 mijë në 8 muaj

Qyteti antik i Butrintit vijon të tërheqë një numër të lartë turistësh vendas e të huaj.

Dorina Dhima, specialiste e turizmit në Parkun Kombëtar të Butrintit, tha për ATSH-në se “nga janari deri në gusht qyteti antik i Butrintit u vizitua nga 56,363 vizitorë, ndërsa të ardhurat për biletat për 8 muaj janë rritur me 44% ose 134,234 00 lekë më shumë se e njëjta periudhë e vitit të kaluar”.

Sa i takon muajit gusht, Dhima tha se ka shënuar numrin më të lartë të turistëve në qytetin antik të Butrintit.

“Gushti ishte muaji me lëvizjen më të lartë të turistëve. Gjatë ditëve të gushtit Butrinti u vizitua nga 21,745 vizitorë, nga të cilët 10,894 vizitorë vendas, 10,368 vizitorë të huaj dhe 483 vizitorë pa biletë. Janë 26.5% vizitorë më shumë se e njëjta periudhë e vitit të kaluar. Ndërkohë që sa i përket të ardhurave nga biletat kanë arritur në 3,121,800 lekë, shifër kjo më e lartë se viti i kaluar”.

Gjatë vitit 2021 ky park u vizitua nga 52,924 turistë, nga të cilët 29,244 janë vendas dhe 23,680 të huaj.

Butrinti sot është një kompleks arkitektonik me 15 zona të periudhave të ndryshme, nga shekulli IV para Krishtit deri në shekullin XVI pas Krishtit. Rëndësia historike e Butrintit është e jashtëzakonshme dhe të jesh në gjendje që të ecësh është një privilegj: statuja me gurë të bardhë nga epoka e August Oktavianit, Agripas, Antiohs, Serapisit, Livia Drusilas ngriheshin dikur këtu, si dhe vendi i lindjes së shumë qytetarëve të shquar në kohë të ndryshme apo gjeneralëve romakë gjatë epokës së ndritur të perandorisë kur qyteti quhej “Colonia Augusta Buthrotum” (Kolonia Augustiane Butrinti). /Kp/Telegrafi/