Gërvalla në Forumin e Bledit: Nuk kërkojmë privilegje, por të na pranoni si anëtar të këtij unioni

Ministrja e Punëve të Jashtme dhe Diasporës, Donika Gërvalla ndodhet për vizitë në Slloveni, ku po merr pjesë në Forumin e Bledit.

Në panelin e këtij Forumi Strategjik, i cili mbledh së bashku liderët e rajonit dhe vendeve të tjera evropiane, Gërvalla ka thënë se Kosova nuk po kërkon privilegje e as rrugë të shkurtra, por të bëhet anëtare e këtij unioni.

“Ne nuk kërkojmë privilegje apo rrugë të shkurtra, por kërkojmë që të na vlerësoni me vlerat që i keni për vete dhe të na lejoni të bëhemi anëtarë të këtij unioni në momentin kur ne përvetësojmë të njëjtat vlera”, është shprehur kryediplomatja e Kosovës.

@gervallaschwarz: “We are not asking for privileges or shortcuts, but we are asking you to value us with the values that you have it for yourself and allow us to become members of this union at the moment when we adopt for ourselves the same values.”

— Bled Strategic Forum (@BledStratForum) August 30, 2022

Në Forum po merr pjesë edhe emisari special i SHBA-së për Ballkanin Perëndimor, Gabriel Escobar.

Ai deklaroi se integrimi i Ballkanit në Bashkimin Evropian nuk ka alternativë dhe se ndihma e BE-së në atë proces është e vetmja përgjigje për krizën e ardhshme ekonomike.

Sipas tij, BE-ja duhet të bëjë shumë për të thjeshtuar procesin.

“Por shumë më tepër punë duhet bërë nga qeveritë e shteteve në anën e tyre për të bërë të mundur procesin e integrimit, ndërkohë që disa shtete dështojnë të përmbushin fare detyrimet e tyre”, deklaroi Escobar. /Telegrafi/