Jep dorëheqjen kreu i policisë kufitare, pas hyrjes “pa u kontrolluar” të patriarkut serb Porfirije në Mal të Zi

Shefi i policisë kufitare, Vasko Akoviq, ka dhënë dorëheqjen nga ajo pozitë, sepse sipas njohurive të mediave në Mal të Zi, patriarku serb Porfirije ka hyrë në Mal të Zi pa u kontrolluar dhe pa u evidentuar.

Këtë informacion e ka komentuar edhe kryetari i Komitetit Malazez të Helsinkit, Miodrag Vllahoviq, i cili ka shprehur respektin e tij për Akoviqin për atë vendim, përcjell Telegrafi.

“Kreu rajonal i policisë kufitare, Vasko Akoviq, ka dhënë sot dorëheqjen nga ajo pozitë për shkak se Patriarku i Kishës së Serbisë, Porfirije Periq, ka hyrë dhe ka dalë në Mal të Zi me të gjithë delegacionin pa asnjë kontroll dhe regjistrim. Respekt i madh për këtë njeri”, ka shkruar Vlahoviq në Twitter.

“Regionalni šef granične policije Vasko Aković podnio je danas ostavku na to mjesto zbog toga što je patrijarh Crkve Srbije Porfirije Perić sa kompletnom delegacijom ušao i izašao iz Crne Gore bez ikakve kontrole i evidencije.”🇲🇪 Veliko poštovanje za ovog čovjeka! @MupCg @VladaCG

— Miodrag Vlahovic🇲🇪 (@Mico_Vlahovic) August 3, 2022

Dorëheqjen e Akoviqit e ka bërë të ditur në rrjetet sociale edhe motra e tij.

“Vëllai im Vasko Akoviq dha dorëheqjen sot sepse kolegët e tij, të cilëve ai ishte shef, i punonin pas shpine dhe organizuan hyrjen e paligjshme të patriarkut në Mal të Zi pa procedurë zyrtare…“, ka thënë Marina Akoviq.

Ndryshe, gjatë vizitës së tij në Mal të Zi është nënshkruar marrëveshja Themelore ndërmjet qeverisë së Malit të Zi dhe Kishës Ortodokse Serbe në Podgoricë.

Marrëveshja është nënshkruar nga kryeministri i Malit të Zi, Dritan Abazoviq dhe kreut të Kishës Ortodokse Serbe, Porfirije. /Telegrafi/