U nisën për në haxh, por mbeten në Aeroportin e Prishtinës – aeroplani defekt teknik

Bashkësia Islame e Kosovës ka bërë të ditur se sot është paraparë që grupi i dytë i besimtarëve të nisen për në haxh, mirëpo aeroplani i paraparë që të vinte t’i merrte besimtarët gjatë fluturimit ka pësuar defekt teknik.

BIK njofton se besimtarët ende janë në ambientet e aeroportin ndërkombëtar “Adem Jashari” në Prishtinë.

Lexoni të plotë njoftimin e BIK-ut:

Avioni i paraparë për t’i dërguar sot në orët e para të mëngjesit grupin e dytë të besimtarëve tanë në haxh, megjithëqë ishte nisur me kohë drejt Prishtinës për t’i marrë besimtarët tanë, gjatë fluturimit ka pësuar defekt teknik, gjë që i ka pamundësuar arritjen në Prishtinë dhe si rezultat i këtij defekti besimtarët tanë ende janë në ambientet e aeroportin ndërkombëtar “Adem Jashari”  në Prishtinë. Së bashku me besimtarët tanë, në aeroport janë edhe përgjegjësit e Haxhit nga Drejtoria e Haxhit, të cilët po e përcjellin situatën.

Drejtoria e Haxhit është në komunikim të vazhdueshëm me kompaninë e kontraktuar “Jordan Aviation” që sa më parë të gjejë zgjidhje për nisjen e besimtarëve drejt destinacionit të tyre.

Kërkojmë ndjesë e mirëkuptim nga besimtarët tanë dhe opinioni i gjerë për këtë vonesë të shkaktuar për shkak të defektit në avion rrugës për në Prishtinë, me shpresë që sa më parë të mundësohet udhëtimi i tyre drejt Arabisë Saudite. /Telegrafi/