Qeveria e Mbretërisë së Bashkuar miraton ekstradimin e Assange në SHBA

Ministrja e Brendshme britanike Priti Patel miratoi të premten ekstradimin e themeluesit të WikiLeaks, Julian Assange në Shtetet e Bashkuara për t’u përballur me akuza penale, duke e sjellë sagën e tij të gjatë ligjore më afër përfundimit.

Assange kërkohet nga autoritetet amerikane për 18 akuza, duke përfshirë një akuzë për spiunazh, në lidhje me lëshimin nga WikiLeaks të një numri të madh të dhënash konfidenciale ushtarake amerikane dhe kabllograme diplomatike, të cilat ata thanë se kishin vënë jetë në rrezik.

Mbështetësit e tij thonë se ai është një hero anti-establishment, i cili është viktimizuar sepse ekspozoi keqbërjet e SHBA-së në konfliktet në Afganistan dhe Irak, dhe se ndjekja e tij është një sulm i motivuar politikisht ndaj gazetarisë dhe fjalës së lirë.

Lexo po ashtu Kush është Julian Assange, i arrestuar në Londër: Çfarë bëri themeluesi i WikiLeaks, pse u arrestua dhe si i kaloi shtatë vitet në azil politik (Foto/Video)

“… Assange ka të drejtën normale 14-ditore për të apeluar”, kanë thënë autoritetet britanike në një deklaratë, përcjell Telegrafi.

Vendimi i Patel nuk do të thotë fundi i betejës ligjore të Assange me origjinë australiane, e cila ka vazhduar për më shumë se një dekadë.

Ai mund të nisë një apel në Gjykatën e Lartë të Londrës.

Ai përfundimisht mund të kërkojë ta çojë çështjen e tij në Gjykatën e Lartë të Mbretërisë së Bashkuar.

Por nëse një apel refuzohet, Assange duhet të ekstradohet brenda 28 ditëve. /Telegrafi/