Pengohet ekipi i TV SYRI në Spitalin e Gjakovës, reagon AGK-ja

Asociacioni i Gazetarëve të Kosovës – AGK, ka njoftuar se ka pranuar me shqetësim pengimin e raportimit të ekipit të TV SYRI në Gjakovë.

Sipas ankesës së kolegëve të TV SYRI, gazetarja e këtij televizioni, Edmonda Avdija, nuk është lejuar të hyjë në Repartin e Transfuzionit të Gjakut në Spitalin “Isa Grezda”, në Gjakovë, nga shefi i këtij reparti, Kreshnik Abrashi.

“Gazetarja Edmonda Avdija nuk është lejuar te hyjë në Repartin e Transfuzionit të Gjakut në Spitalin “Isa Grezda”, nga shefi i këtij reparti, Kreshnik Abrashi, me arsyetimin se më keni publikuar në portal kur jam arrestuar. Ai e ka mbyllur derën me sjellje të vrazhda dhe ka thënë se derisa është shef këtu nuk keni me xhiru”, thuhet në ankesën e televizionit drejtuar AGK-së.

Asociacioni i Gazetarëve të Kosovës, e dënon këtë veprim të Abrashit, njëherësh cilëson se është shkelje flagrante e së drejtës për qasje në informacion, dhe bie në kundërshtim me vlerat e përgjithshme të lirisë së shtypit dhe shprehjes.

“Përpjekja për t’ua imponuar gazetarëve se çfarë të raportojnë, është tendencë për kontrollim të informatave. AGK-ja, njëherësh inkurajon gazetarët që të vazhdojnë të raportojnë dhe të mos heqin dorë nga informimi i qytetarëve”, thuhet në reagim. /Telegrafi/