Të gjitha pamjet që ngjallin dyshime se Vladimir Putin është shumë i sëmurë: Nga mbledhjet me ministrat deri tek takimet me homologët e huaj

Një video e re e presidentit rus, Vladimir Putin duke lëvizur shpesh këmbën teksa ishte ulur në një takim ka nxitur më tej thashethemet se lideri rus nuk është në gjendje të mirë shëndetësore.

Kjo video nuk është e vetmja që prej ditësh spekulohet rreth gjendjes shëndetësore të njeriut të parë në Rusi.

Videoja, e cila u publikua dy ditë më parë, tregon liderin rus duke biseduar me homologun nga Taxhikistani, Emomali Rahmon. Gjatë bisedës, ai disa herë e ngriti dhe e uli këmbën.

Mediume të shumta raportuan se ai “përdrodhi çuditërisht këmbën, sikur të luftonte lëvizjet e papritura të këmbëve”.

Theksohet se lideri i Taxhikistanit e shikonte Putinin “me shqetësim”.

Javët e fundit ka pasur shumë spekulime për gjendjen shëndetësore të presidentit rus, madje ekspertë shëndetësorë dhe politikanë kanë spekuluar se lideri shtetëror rus mund të vuajë nga një sëmundje e rëndë.

Sëmundja e Parkinsonit – një çrregullim i trurit që prek aftësitë motorike – është një gjendje që komentuesit shpesh e përmendin si shkakun e problemeve dhe “sjelljes së pazakontë” të tij.

Sindroma e këmbëve të qeta, një dëshirë e pakontrolluar për të lëvizur gjymtyrët e poshtme dhe këmbët, është një simptomë që shfaqet shpesh nga njerëzit që vuajnë nga sëmundja e Parkinsonit.

Pamjet nga parada në Moskë

Në festimin e Ditës së Fitores në Moskë më 9 maj, Putin mbajti një fjalim, ku dëshmitarë dhe vëzhgues të shumtë theksuan se ai sillej sikur kishte vështirësi në ecje, pra dukej sikur po çalonte.

Gjatë paradës ai u ul i mbuluar me batanije, madje edhe atëherë u vu re se shpesh duke lëvizur këmbën.

Video nga takimi me Shoigu

Në fund të muajit prill, Putini u filmua duke folur me ministrin e Mbrojtjes, Sergei Shoigu në Kremlin, por ai dukej i fryrë në fytyrë dhe i dëshpëruar. Shumë veta vunë re se ai sillej sikur të ishte zhytur në kolltukun në të cilin ishte ulur dhe bie në sy se gjatë gjithë kohës e mbante dorën mbi tavolinë. Ai gjithashtu godiste shpesh këmbën në dysheme gjatë takimit.

Fytyra dhe qafa e 69-vjeçarit dukeshin jashtëzakonisht të fryra, duke nxitur pretendimet se presidenti rus po i nënshtrohet trajtimit me steroide, ndërsa raportet sugjerojnë se ai shoqërohet vazhdimisht nga një mjek i specializuar për kancerin e tiroides.

Kirurgu Yevgeny Selivanov është nga Spitali Klinik Qendror në Moskë, ai ka fluturuar në vendpushimin e Detit të Zi në Socchi – një nga destinacionet e preferuara të presidentit rus – dhjetëra herë në vitet e fundit.

Video nga takimi me Lukashenkon

Një video tjetër që ka nxitur spekulime për “shëndetin e dobët” të Putinit është ajo që tregon atë duke mirëpritur homologun bjellorus, Alexander Lukashenko, ndërsa dora fillon t’i dridhet dhunshëm.

Ai e tërheq atë pranë trupit në një përpjekje për të qetësuar krahun e tij. Megjithatë, ai nuk ia del mbanë në këtë. Më vonë, Putini u pa i ulur në një karrige dhe nuk ia dilte të qetësohej, kështu që ai vazhdimisht lëvizte dhe godiste këmbët e tij.

Thashethemet për presidentin rus kanë qarkulluar edhe më parë duke përfshirë se po lufton me sëmundjen e Parkinsonit, demencën apo kancerin.

Moska i ka hedhur poshtë vazhdimisht akuzat se Putini është i sëmurë rëndë.

Zëdhënësi i Kremlinit, Dmitry Peskov, ka mohuar më parë zërat se ai është nënshtruar një operacioni për kancer tiroide. /Telegrafi/