Kaevski: Shkatërrimi, bllokada dhe dhuna nuk kanë vend në Kuvend

Shkatërrimi, bllokada dhe dhuna nuk kanë vend në legjislativ, tha deputeti i LSDM-së, Darko Kaevski, pasi dje OBRM-PDUKM shpalli bllokadë të Kuvendit nga 10 maji.

LSDM thotë se Kuvendi duhet të jetë institucion i krijimit të ligjeve më të mira në luftën e përditshme për mbrojtjen e standardit të qytetarëve dhe jo mjet për të dëmtuar qytetarët dhe shtetin.

Kaevski tha se në mes të krizës më të madhe energjetike dhe ekonomike në Evropë pas Luftës së Dytë Botërore, kur Kuvendi duhet të sjellë zgjidhje efektive për qytetarët, OBRM-PDUKM paralajmëron bllokada të reja.

“Rruga e zgjedhur nga OBRM-PDUKM me urdhër të Nikolla Gruevskit është e gabuar por nuk do të thotë se po i bëjnë dëm LSDM-së, Qeverisë apo shumicës, por bëjnë dëm të drejtpërdrejtë tek qytetarët dhe shteti. Sikur të mos i mjaftonte Mickoskit që një vit të tërë deputetët e partisë së tij këtu në Kuvend po bllokojnë ligje të rëndësishme për qytetarët, sikur të mos i mjaftonte që bllokon Ligjin për mësimdhënës dhe bashkëpunëtorë profesional në shkollat ​​fillore dhe të mesme, tanimë ngrit iniciativa të tjera në këtë kohë krize për shtetin”, tha Kaevski.

“Ligji për ndërtimin e një qendre të re klinike në Shkup është bllokuar me vite. Imagjinoni, një investim me vlerë 500 milionë euro. OBRM-PDUKM bllokon kushte më të mira për trajtimin e qytetarëve, kushte më të mira të punës për mjekët. OBRM-PDUKM bllokon edhe Ligjin për shërbimin në ushtri, i cili parasheh kushte më të mira për pension dhe paga më të larta për ushtarët. “Dhe kjo nuk i mjafton Mickoskit, kështu që ai paralajmëron bllokada të reja të intensifikuara të Kuvendit”, tha Kaevski.

Ai shtoi se deputetët morën besimin nga qytetarët që të mos bllokojnë por të punojnë, të propozojnë dhe të sjellin zgjidhje ligjore që përmirësojnë cilësinë e jetës.