Gigi Hadid tregon për rrugëtimin e saj drejt gjetjes së lirisë në modë

Si një nga fytyrat më të famshme në botën e modës, Gigi Hadid e di se pjesë e punës së saj është t’i shërbesh imagjinatës së modës, por kjo nuk do të thotë se supermodelja ndihet e detyruar ta bëjë këtë edhe në jetën e saj të përditshme.

Duke folur për mënyrën sesi stili i saj personal ka ndryshuar me kalimin e viteve, veçanërisht pasi u bë nënë dhe përfundoi pandemia, Hadid thotë se ka mësuar të jetë vetvetja kur bëhet fjalë për veshjet e saj.

“Me kalimin e viteve, unë kam pasur prirje të vishem ashtu siç ndihem ditën dhe të mos jem aq e zhytur në stilin e momentit apo të bëj diçka me të cilën nuk ndihem rehat për një paraqitje të caktuar’”.

“Sigurisht, është detyra ime të ofroj fantazi në xhirime dhe në tapetin e kuq, kështu që në jetën time reale, kontrolloj se si ndihem me veten dhe e zgjedh atë”.

Lexo po ashtu Bella Hadid thotë se ndihej si 'motra e shëmtuar' në krahasim me Gigin dhe është pishman që bëri një ndërhyrje në hundë në moshën 14-vjeçare

Hadid thotë se ajo është mësuar të mos i marrë aq seriozisht fotografitë që i bëhen sapo ajo del nga shtëpia, shkruan Harpers Bazaar. “Shiko, ka ditë kur ndihem mirë dhe më pas ka ditë kur padyshim vesh vetëm tuta, mund të më gjykoni për këtë, ose të kuptoni që jam një njeri si gjithë të tjerët. Ndonjëherë dal në rrugë vetëm për të marrë kafe dhe kjo nuk është një sfilatë mode – është shumë normale”.

“Të përballesh me të qenit në sy të publikut është disi si një kërcim – duhet të mësosh të mendosh më pak për opinionet e njerëzve të tjerë, sepse e di çfarë? Thjesht nuk është aq serioze. Moda mund të jetë një mjet i shkëlqyeshëm për vetë-shprehje nëse nuk e merrni shumë seriozisht dhe nuk kujdeseni aq shumë për atë që mendojnë të tjerët. Ndjehem sikur kam një ndjenjë lirie dhe besimi tani”. /Telegrafi/