ASH: Falë veprimeve të Qeverisë aktuale, Maqedonia mbetet njëjtë si në kohën e Gruevskit

Aleanca për Shqiptarët ka reaguar pas publikimit të raportit të Freedom House, në të cilin thuhet se Maqedonia e Veriut është grupin e vendeve me “regjim hibrid”.

Nga ASH thonë se raporti i Freedom House ka konfirmuar të gjitha vlerësimet dhe paralajmërimet e tyre.

“Gjatë 10 vjeçarit të fundit, RMV është në grupin e katër shteteve që kanë shënuar rënie nga demokraci të etabluara në regjime hibride, bashkë me Hungarinë, Malin e Zi dhe Serbinë. Në ndërkohë, disa shtete tjera të rajonit, siç është Republika e Kosovës, kanë shënuar përparim duke dalë nga grupi i vendeve autoritare dhe duke konsoliduar vlerat demokratike. Falë veprimeve të Qeverisë aktuale, vendi ynë mbetet në të njëjtën pozitë si në kohën e Nikolla Gruevskit, duke konfirmuar se Gruevizmi është gjallë edhe pse Gruevski nuk është tanimë këtu”.

Lexo po ashtu Mbetet vend “regjim hibrid”, nuk ka ndryshime në Maqedoninë e Veriut

“Kujtojmë se një muaj më parë, Freedom House në raportin për liritë në botë, kishte konstatuar se “Korrupsioni mbetet një problem serioz dhe ka pasur mosndëshkim të gjerë për zyrtarët e korruptuar të qeverisë, duke përfshirë anëtarët e parlamentit dhe gjyqësorin”. Në raport gjithashtu thuhet se “gazetarët dhe aktivistët ende përballen me presion dhe frikësim”, ndërsa vlerësime negative vendi ka marrë edhe për procesin zgjedhor, pavarësinë e gjyqësorit dhe diskriminimin ndaj shqiptarëve”.

“Tanimë është e qartë se si disa parti “fitojnë zgjedhjet”, përse kemi falje të kriminelëve dhe dënime për qytetarët e pafajshëm, ku shkojnë paratë e qytetarëve dhe sa lejohet fjala e lirë. Gjatë dhjetëvjeçarit të fundit kur vendi kategorizohet si regjim hibrid janë ndërruar dy parti në kampin maqedonas, por e përbashkëta e të gjitha qeverive me regjim hibrid mbetet Bashkimi Demokratik për Integrim”, thonë nga ASH.