Muamer Zukorliqit dyshohet se një helmim i ka shkaktuar vdekjen

Në konferencën për media të familjes së myftiut të ndjerë të Serbisë, Muamer Zukorliq, u zbuluan informacione të reja për shkakun e vdekjes së tij.

Djali i Muamer Zukorliq dhe presidenti i Partisë për Drejtësi dhe Pajtim, Usama Zukorliq tha në një konferencë të jashtëzakonshme për shtyp se laboratorët e huaj deklaruan se Muamer Zukorlic nuk vdiq në mënyrë natyrale dhe se ekziston mundësia që ai të jetë helmuar nga metalet e rënda.

“I nderuar publiku, kanë kaluar pesë muaj e katër ditë nga vdekja e Muamer Zukorliqit. Unë dhe familja ime nuk e pranuam faktin që njeriu i madh i kohës sonë vdiq gjersa institucionet nuk e përcaktuan zyrtarisht shkakun e vdekjes. Në kaosin që na ndodhi atë ditë, ishin të paktë ata që qëndruan me të. Ata që ishin, morën një mostër atë ditë. Na u desh shumë kohë për të gjetur laboratorë adekuat ku dërguam mostrat. Laboratori i parë ka thënë se ka probabilitet të madh që personi i testuar të jetë helmuar me metale të rënda dhe i dyti që vdekja nuk ka ndodhur në mënyrë natyrale”, tha Usame Zukorliq.

Muamer Zukorlic ishte president dhe kryemyfti i Meshihatit të Bashkësisë Islame në Serbi.

Ai gjithashtu ishte edhe nënkryetar i Kuvendit Kombëtar të Serbisë dhe lider i Partisë për Drejtësi dhe Pajtim.

Më 6 nëntor 2021, jozyrtarisht u njoftua se shkaku i vdekjes ishte një atak në zemër. /Telegrafi/