Pupovci: Ndoshta rreth 1 mijë mësimdhënës janë tepricë në Kosovë

Zëvendësministri i Arsimit, Dukagjin Pupovci, i është rikthyer problemit të klasave ku më shumë ka mësimdhënës se nxënës.

Ai ka thënë se ka tepricë të mësimdhënësve në sistemin arsimor të Kosovës, pa treguar se çka do të ndodh me ta.

“Me formulën aktuale të financimit ndoshta rreth një mijë mësimdhënës janë tepricë në sistemin e arsimit. Mirëpo, ne vitin e kaluar kur kemi planifikuar buxhetin për sivjet të gjithë ata mësimdhënës i kemi mbajt në sistem”, deklaroi Pupovci në RTV 21.

“Nuk u kemi thënë komunave largoni nga puna 1 mijë mësimdhënës që ne të kursejmë disa para sepse ata nuk mund të financohen nëpërmjet formulës së arsimit”, shtoi ai.

Pupovci thotë se disa klasë që kanë numër shumë të vogël të nxënësve mbahen për hatër të mësimdhënësve.

“Ekzistojnë klasa të cilat janë me numër të vogël të nxënësve me qëllimin e vetëm që të mos largohen njerëzit nga puna”, tha Pupovci.

“Kur bëhet një rritje e pagave, nëse bëhet për një numër më të vogël nuk është mirë të bëhet me koston e largimit të dikujt nga puna. Krejt këto përllogaritje kërkojnë kohë dhe saktësi”, theksoi Pupovci.