E pësoi me divorc nga burri i saj dhe pushim nga puna – si një video kërcimi virale e një nëne nxiti debat të madh në Egjipt

Një video e vallëzimit të një nëne egjiptiane (të tre fëmijëve) që u bë virale në internet duke e shtyrë burrin e saj të divorcohej nga ajo dhe punëdhënësit e saj për ta shkarkuar, ka ringjallur debate të ashpra mbi të drejtat e grave.

Sipas Al Jazeera, përcjell Telegrafi, videoja e shkurtër e Aya Youssef, një mësuese e shkollës fillore 30-vjeçare, e xhiruar me celular, e tregon atë të veshur me shami, pantallona dhe një bluzë me mëngë të gjata teksa kërcen së bashku me kolegët, duke buzëqeshur ndërsa shijon një lundrim lumi në Nili.

Por videoja, e cila është shpërndarë gjerësisht në rrjetet sociale që nga postimi i saj në fillim të këtij muaji, ka nxitur opinione të ndryshme.

Kështu, disa kritikë e akuzojnë atë për shkeljen e vlerave konservatore të shoqërisë, ndërsa të tjerë qëndrojnë fort me të në solidaritet.

Në vitet e fundit, Egjipti ka qenë dëshmitar i disa rasteve në të cilat gratë i janë nënshtruar fushatave shpifëse në mediat sociale, duke nxitur kërkesa të zemëruara që të adresohen përgjegjësit.

Kjo vjen pasi grupet e të drejtave të njeriut paralajmërojnë për një goditje më të madhe të lirisë në vendin e Afrikës së Veriut që kur presidenti Abdel Fattah el-Sisi mori detyrën në vitin 2014.

Youssef, në një intervistë të fundit me një kanal televiziv privat, tha se ajo kishte qenë “e lumtur” në udhëtim dhe se lëvizjet e saj ishin “spontane”. Ndërsa kolegët e tjerë po kërcenin përkrah saj në varkë nën rrezet e diellit, disa duke tundur duart në ajër.

Por pasi videoja u shpërnda në internet, disa që e shikuan dhanë komente të ashpra për atë që ata e shihnin si sjellje “të pahijshme”.

Një përdorues i Twitter tha se veprimet e mësuesit ishin “të turpshme”, ndërsa një tjetër tha se “nuk mund ta kuptonte se si një grua e martuar do të kërcente në këtë mënyrë të turpshme”.

Por, në një vend ku 90 për qind e grave të moshës 18 deri në 39 vjeç raportuan se ishin ngacmuar në vitin 2019, të tjerat ishin mbështetëse.

Ndërkohë, ministria e arsimit e Egjiptit në rajonin Dakahlia – në verilindje të Kajros – e referoi mësuesen në një komitet disiplinor, ku ajo u shkarkua nga puna në qytetin Mansoura. Mes një proteste të mëvonshme, ajo u rivendos në punë këtë javë.

Nihad Abu al-Qumsan, kreu i Qendrës Egjiptiane për të Drejtat e Grave, e mbrojti mësuesen dhe i ofroi një punë.

Fakti që edhe bashkëshorti i Youssef u divorcua nga ajo pasi pa videon shkaktoi një reagim të zemëruar nga aktorja e njohur egjiptiane Somaya el-Khashab, duke thënë se kjo tregonte standarde të dyfishta.

“Ka kaq shumë gra që qëndrojnë në krah të burrave të tyre edhe kur ata shkojnë në burg, për shembull, ose nuk i braktisin burrat e tyre kur kushtet e tyre përkeqësohen”. /Telegrafi/