Departamenti i Shtetit ndalon hyrjen në SHBA të një zyrtari dhe një ish-zyrtari të Bosnje-Hercegovinës

Po të mërkurën, Departamenti amerikan i Shtetit u ndaloi hyrjen në Shtetet e Bashkuara një zyrtari dhe një ish-zyrtari të Bosnje Hercegovinës, duke përmendur si motivacion “përfshirjen e tyre në korrupsion të konsiderueshëm”, tha Sekretari amerikan i Shtetit, Antony Blinken.

Departamenti i Shtetit shpalli përcaktimin publik për korrupsion përish-presidentin e Këshillit të Lartë Gjyqësor dhe Prokurorial të Bosnje-Hercegovinës Milan Tegeltija dhe Presidentin e Lëvizjes për Veprim Demokratik dhe Përfaqësuesin e Asamblesë Parlamentare Mirsad Kukiç.

“Veprimet e tyre minuan sundimin e ligjit, besimin e publikut në institucionet demokratike dhe proceset publike të qeverisë së tyre, si dhe paqen dhe prosperitetin për qytetarët e Bosnje-Hercegovinës”, thuhet në deklaratën e Sekretarit amerikan të Shtetit.

.@StateDept and @USTreasury have publicly designated officials from Bosnia and Herzegovina (BiH) for corrupt and destabilizing behavior. The United States remains firm in its commitment to a brighter future for BiH’s citizens. #UnitedAgainstCorruption

— Secretary Antony Blinken (@SecBlinken) January 5, 2022

Përcaktimet e Kukiç, një mysliman i Bosnjës dhe zotit Tegeltija, serb i Bonjës, janë bërë sipas nenit 7031(c) të Aktit të Departamentit të Shtetit, për Operacionet e Jashtme të vitit 2021.

“Në cilësinë e tij zyrtare si Kryetar i KLP-së, Tegeltija ishte i përfshirë në akte korruptive që përfshinin përdorimin e ndikimit të tij politik dhe pushtetit zyrtar për përfitimin e tij personal. Konkretisht, ka informacione të besueshme se Tegeltija ka përdorur pozicionin e tij për të kërkuar përfitime në këmbim të ndërhyrjes në një proces gjyqësor, si dhe manipulimit të emërimeve në drejtësi dhe punësime të tjera publike”, thuhet në njoftim.

Në cilësinë e tij zyrtare si menaxher i minierës së Banovicit në pronësi publike dhe si Përfaqësues i Asamblesë Parlamentare, Kukiç u përfshi në “akte korruptive ku përdori ndikimin e tij politik dhe pushtetin zyrtar për përfitimin e tij personal. Konkretisht, ka informacione të besueshme që Kukiç ka përvetësuar fondet publike për përfitime personale dhe ka ndërhyrë në vendimet e punësimit dhe emërimit për të përfituar politikisht”, vazhdon njoftimi.

Departamenti i Shtetit ndaloi nga hyrja në SHBA edhe bashkëshorten e Tegeltija, Tijana Tegeltija.

Blinken thotë në deklartën e tij se vepprimet e Departamentit të Shtetit dhe atij të Thesarit për zotin Dodik, “riafirmojnë përkushtimin e SHBA për sovranitetin dhe integritetin territorial të Bosnje-Hercegovinës, sundimin e ligjit dhe institucionet demokratike dhe një të ardhme më të mirë për qytetarët e vendit”.

Sipas Sekretarit të Shtetit, qeveria amerikane mund të ndërmarrë veprime të ngjashme ndaj drejtuesve të tjerë dhe subjekteve të lidhura me aktorë të korruptuar ose destabilizues.

“Ne do të vazhdojmë të përdorim autoritetet e duhura për të promovuar llogaridhënien për aktorë në të gjithë rajonin dhe globalisht”, shprehet Blinken.