Shfuqizimi i vendimit për shkarkimin e anëtarëve të KPMSHCK-së, Sindikata: Është mbrojtur interesi i shtetit

Sindikata e Shërbimit Civil të Kosovës ka përshëndetur vendimin e Gjykatës Kushtetuese e cila ka shfuqizuar vendimin për shkarkimin e pesë anëtarëve të anëtarëve të Këshillit të Pavarur Mbikëqyrës për Shërbimin Civil të Kosovës.

Përmes një reagimi ata kanë thënë se është mbrojtur interesi i shtetit të Kosovës dhe në veçanti i shërbyesve civil.

“Sindikata e Shërbimit Civil të Kosovës (SSHCK), përshëndet vendimin e Gjykatës Kushtetuese të Republikës së Kosovës i cili konstatoi se; vendimi për shkarkimin e 5 anëtarëve të KPMSHCK-së është kundër kushtetues. Në këtë formë është mbrojtur, në mënyrën më të mirë, interesi i Shtetit të Kosovës dhe Shërbyesve Civil në veçanti ngase, nuk do të duhej në asnjë formë Kuvendi i Kosovës të merret me këtë institucion të pavarur e që ne edhe më herët kemi thënë se është një lloj Gjykate e Shërbimit Civil dhe këtë e ka konfirmuar edhe Gjykata Kushtetuese duke e emërtuar si një lloj ’”tribunali” që nënkupton se kuvendi dhe politika duhet të mbajnë larg duart nga institucionet e pavarura kushtetuese”, thuhet në komunikatë.

Lexo po ashtu Tahiri: Pushteti aktual sot ka marrë goditjen meritore nga Gjykata Kushtetuese

Tutje, në reagim thuhet se “Kjo praktikë e sulmeve dhe etiketimeve pa asnjë justifikim ligjor mbi këto institucione është një pasqyrë jo e mirë edhe në raport me bashkësinë ndërkombëtare dhe dëmton në masë të madhe imazhin e Shtetit të Kosovës, sepse në këtë formë krijon një precedentë të rrezikshëm që çdo qeveri dhe pushtet të merret me këto institucione në vazhdimësi, varësisht se cila parti është në pushtet”.

Lexo po ashtu Kushtetuesja shfuqizon vendimin për shkarkimin e pesë anëtarëve të KPMSHCK-së

“Tendenca për të sulmuar këto institucione të pavarura është në kundërshtim me çdo normë dhe rregull dhe se Kuvendi i Kosovës dhe komisionet parlamentare nuk duhet të luajë rolin e Policisë, Prokurorisë dhe Gjykatës sepse përgjegjësit janë të ndara në këtë aspekt, andaj edhe nuk duhet të ndërhyhet në kompetenca të institucioneve tjera”, thuhet ndër të tjera në këtë reagim.

Po ashtu, Sindikata e Shërbimit Civil të Kosovës kërkon nga kreu i Kuvendit të Kosovës dhe kryesia, që të merr masa ndaj atyre që kanë qenë promotor të këtyre proceseve me ç ‘rast siç shprehen ata “i është shkaktuar dëm i pariparueshëm institucionit më të lartë të vendit tonë Kuvendit të Kosovës, sepse çfarë mund të pritet nga institucionet tjera kur Kuvendi shkel Kushtetutën e Kosovës si dokumenti më i rëndësishëm i vendit”.

“Apelojmë që të mos kalohet pa llogaridhënie ata që kanë shkelë kushtetutën e vendit tonë”. /Telegrafi/