Java e punës do të zgjasë katër ditë e gjysmë në Emiratet e Bashkuara – fundjava fillon ditën e premte, para faljes së namazit të drekës

Autoritetet në Emiratet e Bashkuara Arabe thanë të martën se do të kalojnë nga viti i ardhshëm në një javë pune katër ditë e gjysmë.

Shteti i Gjirit, i cili prodhon naftë, një qendër rajonale tregtare dhe turistike, tani ka një fundjavë nga e premtja në të shtunë, dhe nga 1 janari 2022, fundjava do të fillonte të premten në mesditë dhe do të përfundonte të dielën, shkruan reuters.

Emiratet e Bashkuara Arabe kanë ndërmarrë hapa gjatë vitit të kaluar për ta bërë ekonominë e saj më tërheqëse për investimet e huaja dhe personelin e talentuar në një kohë të rivalitetit ekonomik në rritje me Arabinë Saudite fqinje.

Java e punës për institucionet qeveritare do të fillojë të hënën dhe do të përfundojë të premten në orën 12 të mesditës, para namazit të së premtes, thuhet në një deklaratë të qeverisë, duke shtuar se kjo do të përmirësojë ekuilibrin mes biznesit dhe jetës private të punonjësve.

Autoritetet besojnë se masa do të sigurojë transaksione më të lehta financiare, tregtare dhe ekonomike me vendet pas fundjavës nga e shtuna në të diel, duke lehtësuar lidhjet më të forta ndërkombëtare të biznesit.

E premtja është ditë pushimi dhe jo pune në shumë vende me shumicë myslimane.

Monica Malik, një ekonomiste në Bankën Tregtare të Abu Dhabi, tha se “ajo pret që shumë kompani të sektorit privat në Emiratet e Bashkuara Arabe të ndjekin fundjavën nga e shtuna deri të dielën, duke e përshkruar masën si një zhvillim shumë domethënës në lidhje me reformat e fundit”.

Emiratet e Bashkuara Arabe kanë liberalizuar ligjet e bashkëjetesës paramartesore, ligjet për alkoolin dhe statusin personal me futjen e vizave afatgjata si një mënyrë për të tërhequr dhe mbajtur staf të talentuar dhe për të inkurajuar më shumë kompani për të investuar. /Telegrafi/