Vendimi i Supremes për rivotim të diasporës në Dragash, KQZ-ja mban sot mbledhje

Gjykata Supreme e Kosovës ka marrë vendim që të përsëritet procesi i votimit nga jashtë për komunën e Dragashit.

Kështu thuhet në aktgjykimin e kësaj gjykate të cilin e ka siguruar Telegrafi.

“Urdhërohet Komisioni Qendror i Zgjedhjeve që brenda Kornizës Ligjore në fuqi të organizojë përsëritjen e Procesit të Votimit nga jashtë, për raundin e dytë të zgjedhjeve lokale për kryetar të komunës së Dragashit”, thuhet në aktgjykim.

Lexo po ashtu Supremja vendos që të përsëritet votimi nga jashtë për komunën e Dragashit

Zëdhënësi i KQZ-së, Valmir Elezi ka thënë për Telegrafin se për këtë gjë KQZ-ja sot do të mbajë mbledhje për vendosur për procesin e rivotimit në këtë komunë.

“E konfirmoj se gjatë ditës kemi pranuar vendimin e Gjykatës Supreme, përmes së cilit urdhërohet Komisioni Qendror i Zgjedhjeve për përsëritjen e raundit të dytë të votimit jashtë Kosovës që i takon Zgjedhjeve për Kryetar të Komunës së Dragashit. Me qëllim të zbatimit të këtij vendimi, gjatë ditës së sotme (e enjte, 25 nëntor, ora 16:00) KQZ-ja do të mbajë mbledhje. Lidhur me mënyrën e zbatimit të këtij vendimi, do të njoftoheni në këtë mbledhje”, tha Elezi ./Telegrafi/