Bosnja dhe Hercegovina është në prag të kolapsit, paralajmërojnë eurodeputetët

Eurodeputetët kanë paralajmëruar se situata aktuale në Bosnje dhe Hercegovinë mund të rindezë konfliktin në vend.

Sipas medieve të huaja, përcjell Telegrafi, paralajmërimet erdhën në mes të një debati të Parlamentit Evropian mbi planet e Milorad Dodik – anëtari aktual serb-boshnjak i presidencës trepalëshe të nivelit shtetëror të Bosnjës dhe Hercegovinës – për të ndarë rajonin e tij nga shteti.

Serbët prej vitesh kanë mbrojtur ndarjen e njësisë së tyre administrative, ose entitetit të Republika Srpska, nga pjesa tjetër e vendit.

Udhëheqësi i lartë politik serb i Bosnjës njoftoi planet për të krijuar ushtrinë, autoritetin tatimor dhe gjyqësorin e Republika Srpska deri në fund të muajit nëntor.

“Kjo jep një sinjal shumë të gabuar dhe mund të çojë përsëri në konflikt dhe dhunë etnike”, tha ligjvënësi, Andrey Kovatçev, një anëtar i grupit të Partisë Popullore Evropiane.

Komentet e Kovatçev u përsëritën edhe nga ato të Pedro Marques nga grupi Aleanca Progresive e Socialistëve dhe Demokratëve.

“Njëzet e pesë vjet pas luftës civile, në të cilën mbi 100,000 njerëz humbën jetën, Bosnja dhe Hercegovina është përsëri në prag të kolapsit”, paralajmëroi ai. “Kjo mund të shënojë një rikthim në dhunën e viteve 90-ta”.

Ai i bëri thirrje Bashkimit Evropian që të vendosë sanksione, nëse është e nevojshme, për të ruajtur integritetin territorial të Bosnjës. /Telegrafi/

The signals from #BiH аre extremely worrying! The three communities have to have access to fair representation! To achieve that compromises will be needed from all sides. The EPP Group remain committed to assist its partners in the WB region on their path to #EUintegration!

— Andrey Kovatchev (@andreykovatchev) November 23, 2021