Jasharaj: Paralajmërojmë protesta në dhjetor dhe greva në janar

Kryetari i Sindikata e Bashkuar e Arsimit, Shkencës dhe Kulturës (SBASHK), Rrahman Jasharaj ka theksuar se dhjetori dhe janari do ta gjejë vendin me protesta e greva në sistemin arsimor.

Jashari gjatë debatit me temën “Pagat në sektorin publik, statusi aktual i projektligjit dhe urgjenca e procedimit të tij”, organizuar nga grupi parlamentar i AAK-së, tha se SBASHK-u është në një situatë të pakëndshme dhe ka kërkuar nga shoqëria civile që mos t’i drejtojnë shigjetat nga sindikatat për veprime sindikale.

“Se jemi në hall të madh, dhe pa dashjen tonë, kam fikë se do të kthehet edhe arsimi dhe shëndetësia në një situatë tepër të pakëndshme, të cilën nuk e duam. Qeveria Kurti ka muaj që ka ardhur, por asnjëherë nuk i ka hapur dyert e dialogut. SBASHK-u mund ta kuptojë pak kryeministrin Albin Kurti se ndoshta ka detyra të tjera, por s’ka mundësi të kuptojë ministrin Hekuran Murati, i cili ka harruar se është edhe ministër i Punës dhe Mirëqenies Sociale. Ne jemi në presion më të madh të anëtarësisë, ata po kërkojnë çfarë (po ndodh) me Ligjin e Pagave. Mos i drejtoni shigjetat nga ne, nëse nuk ka përgjigje nga Qeveria, deshëm apo ajo do të gjendemi në greva e protesta. Më 4 dhjetor veç do të fillojmë me protesta, më 18 me të tjera dhe janari do të jetë me grevë. Nuk e dëshirojmë këtë, por si duket Qeveria Kurti po na orienton drejt kësaj situate të keqe”, theksoi Jashari.

Lexo po ashtu Haradinaj kërkon miratimin e Ligjit të Pagave: Institucionet po i rrezikojnë qytetarët

Ndërsa, kryetari i Aleancës për Ardhmërinë e Kosovës (AAK), Ramush Haradinaj ka kërkuar miratimin e Ligjit të Pagave.

“Nëse ne nuk e përcjellim trendin e rritjes lineare që është një mandat katër vjeçar mbi 20 për qind fuqizojmë këtë Ligj, tani ne jemi ka e rrezikojmë krejt sektorit publik në Kosovë. Institucionet nuk po e rrezikojnë vetëm administratën ose vetëm arsimin e shëndetësinë, por po e rrezikojnë direkt qytetarin, për shkak se ai është përfitues i këtyre shërbimeve”, u shpreh Haradinaj.

Ai tha se me gjendjen aktuale do të ketë varfërim të sektorit privat dhe kualitet më të dobët në shërbim. /Telegrafi/