Të mërkurën pritet të shpallen rezultatet përfundimtare të zgjedhjeve lokale

Në Qendrën e Numërimit dhe të Rezultateve (QNR) sot ka filluar numërimi i votave me kusht dhe personave me nevoja të veçanta, ndërkaq zëdhënësi i Komisionit Qendror të Zgjedhjeve, Valmir Elezi tha se nëse gjithçka shkon sipas planifikimeve atëherë KQZ të mërkurën mund t’i shpallë rezultatet përfundimtare të raundit të parë të zgjedhjeve lokale.

Zëdhënësi i Komisionit Qendrorë të Zgjedhjeve (KQZ) në një konferencë për medie bëri të ditur se numri i përgjithshëm i fletëvotimeve që do të numërohen është 15 mijë e 482, ku prej tyre 12 mijë e 960 është numri i fletëvotimeve me kusht dhe 2 mijë e 522 të atyre personave me nevoja të veçanta.

“Gjatë ditës së sotme në Qendrën e Numërimit dhe Rezultateve do të bëhet numërimi i votave me kusht dhe atyre të personave me nevoja të veçanta. Numri përgjithshëm i fletëvotimeve që do të numërohen është 15 mijë e 482, prej të cilave numri i zarfeve me fletëvotime me kusht është 12 mijë e 960, ndërsa 2 mijë e 522 të tjera u takojnë personave me nevoja të veçanta të cilët kanë votuar përmes ekipeve mobile,” ka treguar Elezi, duke shtuar se nëse gjithçka shkon sipas planifikimeve, atëherë KQZ të mërkurën do t’i shpallë rezultatet përfundimtare të raundit të parë të zgjedhjeve lokale. /Telegrafi/